लैनचौरमा जिल्लाव्यापी वृहत खेलकुद प्रतियोगिता सुरु : करिब १ हजार खेलाडी प्रतिस्पर्धामा 

काठमाडौँ । आजदेखि काठमाडौँ जिल्लाव्यापी वृहत खेलकुद कार्यक्रम सुरु भएको छ । लैनचौर ग्राउण्डमा आयोजना गरिएको कार्यक्रममा स्वास्थ्य तथा जनसंख्या मन्त्री प्रदीप पौडेलले दीप प्रज्वलन गरेर तथा महानगरपालिकाका उपप्रमुख सुनिता डंगोलले ओलम्पियन सन्ध्या शाक्यलाई ओलम्पिक टर्च प्रदान गरेर प्रतियोगिता शुभारम्भ गर्नुभएको हो । महानगरपालिकाको वडा नम्बर २६ ले आयोजना गरेको प्रतियोगितामा महानगरपालिकाका वडाहरुसँगै जिल्लाका करिब १ हजार खेलाडीले विभिन्न ५ वटा विधामा प्रतिस्पर्धा गर्दैछन् । 

महानगरपालिकाका वडा नम्बर ३० र १४ का बिच भएको उद्घाटन खेलमा मन्त्री पौडेल र उपप्रमुख डंगोलले रेफ्रीलाई फुटबल प्रदान गर्नुभएको थियो । शुभारम्भ अवसरमा खेलाडीहरुको मार्चपास, स्थानीय सांस्कृतिक झाँकी र नृत्य प्रस्तुत गरिएको थियो ।  

त्यस क्रममा बोल्दै मन्त्री पौडेलले खुशी रहन स्वस्थ्य रहनु पर्ने बताउनुभयो । खेल र स्वास्थ्यको प्रसङ्ग जोड्दै उहाँले भन्नुभयो, ‘खेलले स्वस्थ्य जीवन प्रदान गर्छ । स्वस्थ्य जीवनमा मात्र खुशी प्राप्त हुन्छ ।’ उहाँले भन्नुभयो, ‘मन र सरीरलाई कसरी स्वस्थ्य राख्ने औपचारिक शिक्षामा समावेश हुन सकेको छैन । यसबेला महानगरपालिकाको वडा नम्बर २६ ले जिल्ला स्तरीय खेल आयोजना गर्नु सशक्त सन्देश हो । खेलबाट स्वस्थ्य जीवन र स्वच्छ समाजको प्रवर्धन, टोलबासी, वडाबासी र अन्तरपालिका सद्भाव बढाउँछ ।’

‘विकेन्द्रीकृत कार्यक्रमबाट वडालाई शसक्त बनाउने र नागरिकका ढोकामै कार्यक्रम पुर्‍याउने महानगरपालिकाको नीति हो ।’ कार्यक्रममा महानगरपालिकाका उपप्रमुख डंगोलले भन्नुभयो, ‘वडाबाट जिल्ला स्तरीय प्रतियोगितात्मक कार्यक्रम आयोजना गर्नु यसको उदाहरण हो । वडासँगै केन्द्रबाट पनि खेलकुदका कार्यक्रम सञ्चालन भइरहेका छन् ।’ उहाँले खेलकुदमा सबैलाई अवसर प्रदान गर्ने कार्यक्रम उल्लेख गर्दै भन्नुभयो, ‘दृष्टिविहीनहरुका लागि फुटसल, व्हीलचेयर प्रयोगकर्ताहरुका बिचमा बास्केटबल प्रतियोगिता, पूर्ण अशक्त र अति अशक्तहरुका लागि बोसिया खेल सम्पन्न गरेका छौँ । हामी चाहन्छौँ, अवसर पाइन भनेर कसैले गुनासो गर्नु नपरोस् । यसका लागि हामी काम गरिरहेका छौँ ।’

‘यो शुरुवात् हो । यसलाई थप वृहत र परिष्कृत गर्दै लैजानेछौँ ।’ कार्यक्रममा वडाध्यक्ष ख्यामराज तिवारीले भन्नुभयो, ‘हरेक वर्ष यसप्रकारको प्रतियोगिता सञ्चालन गर्ने योजना छ । प्रतियोगिताबाट खेलाडी उत्पादन गर्ने, सहरी स्वास्थ्य र सामाजिकीकरण योगदान हुने हाम्रो अपेक्षा हो ।’ तिवारीको भनाइ थियो ।    

‘प्रतियोगितामा फुटसल, टेवुलटेनिस, तेक्वान्दो र कराँतेका २ विधा गरी ५ विधामा प्रतिस्पर्धा हुनेछ ।’ खेल संयोजक प्रवेश श्रेष्ठ भन्नुहुन्छ, ‘प्रतियोगिताका बारेमा जानकारी दिँदै भन्नुहुन्छ, ‘वडाभित्र फुटसल, टेबुलटेनिस, बास्केटबल लगायत खेलका लागि पूर्वाधार उपलब्ध भएकाले प्रतिस्पर्धा गराउन सजिलो भएको हो । सबै विधामा गरेर करिब १ हजार खेलाडीहरु प्रतिस्पर्धामा हुनुहुन्छ ।’ 
वडाले चालु आर्थिक वर्षमा खेलकुदाका लागि ३५ लाख रुपैयाँ विनियोजन गरेको छ । 

प्रतियोगिताअन्तर्गत फुटसल विधामा पुरुषहरुका बिच प्रतिस्पर्धा हुनेछ । नकआउटका आधारमा खेलाइने खेलमा प्रथम हुने टोलीलाई १ लाख ५० हजार रुपैयाँ, उपविजेता टीमलाई ७५ हजार रुपैयाँ नगदसहित पुरस्कार, ट्रफी र प्रमाण पत्र प्रदान गरिनेछ । यस्तै उत्कृष्ट खेलाडी, सर्वाधिक गोलकर्ता र उत्कृष्ट गोलरक्षक १० हजार रुपैयाँका दरले पुरस्कृत गरिनेछ । 

तेक्वान्दो प्रतियोगिताको पहिलो, दोस्रो र तेस्रो टीमलाई क्रमशः ७५ हजार, ५० हजार र २५ हजार रुपैयाँसहित पुरस्कृत गरिनेछ । उत्कृष्ट खेलाडीलाई १० हजार प्रदान गरिनेछ । महिला तथा पुरुष टेबुल टेनिसतर्फ पहिलो, दोस्रो र तेस्रो स्थान हासिल गर्नेलाई क्रमशः २० हजार, १० हजार र ५ हजार रुपैयाँसहित पुरस्कार प्रदान गरिनेछ । 

यस्तै, फुल कन्ट्याक्ट क्योकुसिन कराँते (आइ. के. यु) तौल समूहमा खेलाइनेछ । यो पुरुषहरुका बिच प्रतिस्पर्धा हुनेछ । यसमा पहिलो, दोस्रो र तेस्रो हुने टीमलाई क्रमशः १० हजार, ८ हजार, ६ हजार रुपैयाँसहित पुरस्कृत गरिनेछ । सान्त्वाना पुरस्कारमा ५ हजार रुपैयाँ नगदसहित पुरस्कृत गरिनेछ । 

डब्लु. के. एफ. कराँते प्रतियोगिता महिला खेलाडीहरुका बिचमा हुनेछ । यसमा एकल प्रतियोगितामा पहिलो, दोस्रो र तेस्रो हुनेलाई क्रमशः ३० हजार रुपैयाँ, १५ हजार रुपैयाँ र १० हजार रुपैयाँ नगदसहित पुरस्कार प्रदान गरिनेछ । यस्तै टीम विजेता पहिलो दोस्रो र तेस्रोलाई क्रमशः ५० हजार, २५ हजार र २० हजार रुपैयाँ नगदसहित पुरस्कृत गरिनेछ । खेलका संयोजक सन्तोष श्रेष्ठका अनुसार सामान्यतयाः कराँते एकल खेलाडीहरुका बिचमा हुने प्रतिस्पर्धा हो । यस पटक महिलाहरुका बिचमा सामुहिक प्रतिस्पर्धा गराइनेछ ।