पूर्व वडाध्यक्ष माणिकरत्न स्थापितको निधन : आज अन्त्येष्टि  

काठमाडौँ, माघ २ । काठमाडौँ महानगरपालिकाका वडा नं. २२ का पूर्वअध्यक्ष माणिकरत्न स्थापितको हृदयाघातका कारण मृत्यु भएको छ । ८२ वर्षिय स्थापितको बिहीबार राती निधन भएको हो । उहाँ उपचारका लागि आउँदो सोमबार भारत जाने तयारीमा हुनुहुन्थ्यो । उहाँका २ छोरा र १ जना छोरी हुनुहुन्छ । उहाँकी श्रीमती र एउटा छोरा संयुक्त राज्य अमेरिकामा हुनुहुन्छ । परिवारका सदस्यहरु नभए पनि आज टेकुस्थित जम्बुदीपमा अन्त्येष्टि गरिने निर्णय गरिएको वडा नं. २२ का अध्यक्ष चिनीकाजी महर्जनले जानकारी दिनुभयो । 

पेशाले इञ्जिनियर स्थापित इञ्जिनियरिङ् पेशा छोडेर २०४४ सालमा पहिलो पटक जनपक्षीय उम्मेदवारका रुपमा चुनावी प्रतिस्पर्धामा होमिनुभयो । त्यो चुनावमा उहाँले पराजय भोग्नु परेको थियो । २०४६ सालमा प्रजातन्त्र पुनवहाली भएपछि २०४९ सालको स्थानीय निर्वाचनमा उहाँ नेकपा एमालेको उम्मेद्वारका रुपमा विजयी हुनुभएको थियो । 

उहाँ २०६० सालमा राजाको शासन कालमा वडाध्यक्ष मनोनीत हुनुभएको थियो । नेपालको संविधान जारी भएपछिको पहिलो स्थानीय तह निर्वाचन २०७४ मा नेकपा माओवादी केन्द्रका तर्फबाट वडा २२ मा चुनावी प्रतिस्पर्धामा हुनुहुन्थ्यो । त्यस समयमा उहाँ नेकपा एमालेका उम्मेदवार चिनीकाजी महर्जनसँग पराजित हुनुभएको थियो ।

त्यस यता संकटा क्लवको सल्लाहकारलगायत स्थानीय क्लव तथा संघसंस्थामा आवद्ध भएर सामाजिक काममा सक्रिय हुनुहुन्थ्यो ।