काठमाडौँ । काठमाडौँ महानगरपालिकाको शिक्षा सल्लाहकारमा रेशु अर्याल नियुक्त हुनुभएको छ । प्रमुखस्तरीय निर्णयबाट उहाँ नियुक्त हुनुभएको, प्रमुख बालेन्द्र शाह (बालेन) का प्रमुख स्वकीय सचिव भुपदेव शाहले जानकारी दिनुभयो ।  

अर्यालले सिङगापुरको नेसनल इन्स्टिच्युट अफ एडुकेसनबाट स्नातक र कोलम्बिया विश्वविद्यालयको टिचर्स कलेजबाट शैक्षिक सुधारका लागि नेतृत्व विषयमा स्नातकोत्तर गर्नुभएको छ । २०१७ मा शिक्षा क्षेत्रमा योगदान गरे बापत सिङ्गापुरको नेशनल इन्स्टिच्युट अफ एडुकेशनले प्रतिष्ठित पुरस्कारबाट पुरस्कृत गरेको थियो ।

अर्याल सामाजिक अभियन्ता हुनुहुन्छ । उहाँले टिच फर नेपालको ५ बर्ष अध्यक्षका रुपमा काम गरिसक्नु भएको छ । अहिले उहाँ नेतृत्व परिषदको सदस्य हुनुहुन्छ । सन् २०१७ को सेप्टेम्बरदेखि २०२२ को मार्चसम्म उहाँ फुल ब्राइटको कार्यकारी निर्देशक हुनुहुन्थ्यो ।

उहाँ हवेली आउटडोर लर्निङ् सेन्टरको संस्थापक निर्देशक हुनुहुन्छ । यसले नेपाली शिक्षामा वातावरण संरक्षणसँगको प्राथमिकता स्थापित गर्छ । बालबालिकालाई प्रकृतिसँग घुलमिल गराएर व्यवहारिक सिकाई प्रवर्धन गर्नु यसको उद्देश्य हो । सार्वजनिक र सामुदायिक बिद्यालयको बिकास र सबलीकरणका लागि अर्यालबाट योगदान पुग्ने अपेक्षा गरिएको छ ।