नेपालका लागि व्रिटिसका राजदूत रोब फेनबाट सिप मेलाको अवलोकन 

काठमाडौँ । नेपालका लागि संयुक्त राज्य वेलायतका राजदूत रोब फेनले आज टुँडिखेलमा चलिरहेको सिप मेलाको अवलोकन गर्नुभएको छ । उहाँलाई सिप मेला कार्यान्वयन समितिका संयोजक इञ्जिनियर शैलेन्द्र झा र प्रमुखको सचिवालय सल्लाहकार सन्तोष गिरीले प्रशिक्षणका क्षेत्र, पेशा, पाठ्यक्रम र अहिलेसम्म प्राप्त उपलब्धीका विषयमा जानकारी गराउनुभएको थियो । अवलोकनका क्रममा राजदूत फेनले प्रशिक्षणका लागि प्रशिक्षकको क्रियाकलाप, प्रशिक्षार्थीहरुको रुचि, प्रशिक्षणबाट उत्पादन भएका बस्तु तथा सामग्रीका बारेमा रुचिपूर्वक जानकारी लिनुभएको थियो । 

अवलोकन पछि उहाँले भन्नुभयो, उद्योग, उद्यम, रोजगारीका अवसरका लागि सिप मेला वृहत अनुभूति गरेको बताउनुभयो । ‘यो ठुलो र महत्वपूर्ण काम हो । महानगरपालिकाको यो प्रयास सराहनीय छ ।’ उहाँले महानगरपालिकाले सञ्चालन गरेको बुक फ्री फ्राइडेमा शिक्षासँगै सिपमूलक र व्यवहारिक तालिमका कार्यक्रमबाट विकास साझेदार प्रोत्साहित थिए । उहाँले भन्नुभयो, ‘सिप मेलाले  साझेदारीको सम्भावनालाई अझ व्यापक बनाएको छ । हामी आगामी वर्षको मेलामा सहकार्य गर्न इच्छुक छौँ ।’ तालिमबाट युवाहरुले त सम्भावना देख्छन् नै यसमा सेवा निवृत्त व्यक्तिहरुका लागि पनि तालिम देखियो । यसको प्रभावको ठुलो मूल्य छ । उहाँको भनाइ थियो । 

राजदूतलाई मेलाको विशेषता बताउँदै संयोजक झाले भन्नुभयो, ‘३० भन्दा धेरै साझेदार, १० वटा क्षेत्र र ३७ पेशाका तालिमभित्र बहिरा अपाङ्गता भएका व्यक्ति, अटिजम, डाउन सिन्ड्रोम भएका बालबालिकाहरुका लागि सहजकर्ता तालिम मेलाको मुख्य विशेषता हुन् ।’ मेला समावेशी र पहुँचयुक्त छ । यसबाट प्राप्त हुने नतिजाले दिगो विकासमा सघाउँछ । झाले अपेक्षित नतिजा सुनाउनुभयो । 

त्यस क्रममा सचिवालय सल्लाहकार गिरीले, मेला एकै ठाउँमा रैथाने र परम्परागत सिपदेखि अत्याधुनिक सिप विकास भइरहेको जानकारी दिनुभयो । सामान्य लेखपढ गर्न जान्नेदेखि औपचारिक योग्यता हासिल गरेका व्यक्तिहरुका लागि रुचि अनुसारका प्रशिक्षण चलाउनु मेलाको महत्वपूर्ण पक्ष हो । गिरीको भनाइ थियो ।