सामाजिक र खेलकुद क्षेत्रमा लगानी बढाएर विकासलाई सन्तुलित बनाउँदै लगेका छौँ - वडाध्यक्ष, तिवारी 

काठमाडौँ । वडावासीलाई स्वाबलम्बी बनाउँदै आफ्नै कार्यक्रममा गर्व गर्ने बनाउँदै लगेको बताउँदै काठमाडौँ महानगरपालिका वडा नम्बर २६ का अध्यक्ष ख्यामराज तिवारीले, उमेर, रुचि, समयको माग र समाजको आवश्यकताका आधारमा वडावासीका लागि क्षमता विकासका कार्यक्रमलाई थप्दै लैजाने बताउनुभएको छ । वेभ पेज डिजाइनिङ् सम्बन्धी १२० घण्टे तालिमको समापन अवसरमा कम्प्युटर प्वाइन्टमा आयोजना गरिएको समापन कार्यक्रममा उहाँले यस्तो धारणा राख्नुभएको हो । बालबालिकाका भोलि आवश्यक पर्ने पौडीलगायतका खेलकुद, युवाहरुलाई सवारी चालक, प्रौढका लागि अनुभव आदानप्रदान र पाका उमेरका व्यक्तिहरुलाई तीर्थाटनलगायत कार्यक्रम गरिरहेको उहाँको भनाइ छ । 

वडामा खेलकुदका लागि भएका पूर्वाधारलाई सुदृढ गर्दै लगेको बताउँदै उहाँले आगामी आर्थिक वर्षमा चालु आर्थिक वर्षका भन्दा थप र व्यक्ति तथा समाजले चाहना गरेका कार्यक्रम तर्जुमा हुने धारणा राख्नुभयो । आइटी र आइसीटी सम्बन्धी तालिमले युवाहरुलाई वृत्ति विकासमा योगदान हुने उहाँको भनाइ थियो । 

प्लस टु र स्नातक उत्तीर्ण युवाहरुका लागि प्रदान गरिएको १२० घण्टे तालिममा एचटीएमएल, सीएसएस, जाभा स्क्रिप्ट, वेभ डिजाइनिङ् टुल्स, रेस्पोन्सिभ वेभ डिजाइनिङ्, वेभ टोपोग्राफी, वर्ड प्रेस, फोटोसप सिकाइएको थियो ।