काठमाडौँ महानगरपालिका वडा नं. ७ को सेवा प्रवाह मित्रपार्कस्थित आफ्नै भवनबाट सुरु

काठमाडौँ – काठमाडौँ महानगरपालिका वडा नं. ७ ले आफ्नै भवनबाट सेवा प्रवाह सुरु गरेको छ । मित्रपार्कस्थित भवनमा वैदिक विधिअनुसार पूजाआजा गरी भदौ १ गतेदेखि सेवा सुरु गरिएको वडा अध्यक्ष विमल कुमार होडाले जानकारी दिनुभयो । 

“वडा नं. ७ को नवनिर्मित भवनमा कार्य शुभारम्भको अवसरमा हवन शान्ति स्वस्तिवाचन विधिपूर्वक सम्पन्न गरिएको छ । भदौ १ गते देखि आफ्नै भवनबाट सेवा संचालन भइरहेको छ। भवनको औपचारिक उद्घाटन चाँडै गर्ने तयारीमा छौं ।”

यसअघि वडा कार्यालय गङ्गाहिटीस्थित भाडाको भवनबाट सेवा दिँदै आएको थियो । अब वडा नं. ७ का सेवाग्राहीले आवश्यक सम्पूर्ण सेवा आफ्नै वडा भवनबाट प्राप्त गर्न सक्नेछन् ।

वडा सचिव पदमकेशर अधिकारीका अनुसार भवन निर्माणका लागि आर्थिक वर्ष २०८०/८१ को अन्त्यतिर ठेक्का सम्झौता भएको थियो र करिब १३ महिनाभित्रै निर्माण सम्पन्न भएको हो । उहाँले भन्नुभयो, “भवनको भुईँतला पहिले नै थियो । बलियो फाउन्डेसन भएकाले मोडिफाइ गरेर अढाइ तला थप गरिएको हो ।”

नव–निर्मित भवनको भुईँतलामा प्रशासनिक कक्ष, पहिलो तलामा जनप्रतिनिधि तथा मेलमिलाप कक्ष र दोस्रो तलामा सभाकक्षसहित थप प्रशासनिक कक्षहरू रहेका छन्। अब वडास्तरीय स–साना कार्यक्रमहरू पनि वडा भवनकै सभाकक्षमा आयोजना गर्न सकिने वडा सचिव अधिकारीले जानकारी दिनुभयो ।