'मिस्टर महानगर' उपाधिका लागि ३८ जना खेलाडीबिच प्रतिस्पर्धा हुने : भोलि अन्तिम प्रतिस्पर्धा

काठमाडौँ । ‘मिस्टर महानगर’ शारीरिक सुगठन प्रतियोगिताका लागि ३८ जना खेलाडी प्रतिस्पर्धामा छन् । आज राष्ट्रिय सभा गृहमा सम्पन्न तौल मापनबाट विभिन्न तौल समूहका खेलाडीहरुको संख्या कायम गरिएको छ । जसमा ७५ के. जी. माथिको तौल समूहका खेलाडीको संख्या ६ जना रहेको छ । ७५ के. जी. सम्म तौल समूहका खेलाडीको संख्या ५ जना, ७० के. जी. सम्म तौल समूहका ६ जना, ६५ के. जी. सम्म तौल समूहका ८ जना, ६० के. जी. सम्मको तौल समूह भएका खेलाडीको संख्या ७ जना ५५ के. जी. सम्मको तौल समूहका ६ जना खेलाडी प्रतिस्पर्धामा रहेको वडाध्यक्ष चिनीकाजी महर्जनले जानकारी दिनुभयो ।  

खेलाडीहरुको सहभागिता र प्रतिस्पर्धाप्रतिको उत्साहले हामी पनि उत्साहित भएका छौँ । वडाध्यक्ष महर्जनको प्रतिक्रिया छ ।  

काठमाडौँ महानगरपालिकाको वडा नम्बर २२ ले ‘हेल्दी बडी, हेल्दी सोसाइटी’ नारासहित ‘फस्ट मिस्टर महानगर वडी विल्डिङ् च्याम्पियनसिप २०८२’ आयोजना गरेको हो । प्रतियोगितामा नेपाल शारीरिक सुगठन तथा फिटनेस महासंघसँगको सहकार्य र काठमाडौँ शारीरिक सुगठन तथा फिटनेस संघको प्राविधिक सहयोग रहेको छ ।

वल्र्ड बडी विल्डिङ् फेडेरेसनका अन्तरराष्ट्रिय निर्णायक एवं च्याम्पियनसिपका संयोजक ईश्वर श्रेष्ठका अनुसार क्याटागोरीका हरेक प्रथम, द्वितीय र तृतीयलाई क्रमशः स्वर्ण र नगदर ७५ हजार रुपैयाँ, रजत पदक र ५० हजार रुपैयाँ र कास्य पदक २५ हजार रुपैयाँ नगद प्रदान गरिनेछ । भोलि राष्ट्रिय सभा गृहमा प्रिजजिङ् र फाइनल प्रतियोगिता हुनेछ ।

प्रत्येक तौल समूहका विजेताहरुका मिस्टर महानगरको दावेदार हुनेछन् । यी दावेदारहरुका बिचमा ओभरअल प्रतिस्पर्धा हुनेछ । प्रतिस्पर्धाका विजेता मिस्टर महानगर घोषित हुनेछन् । मिस्टर महानगरले तौलसमूहको विजेता भएर ७५ हजार रुपैयाँ र ओभरअल प्रतिस्पर्धाको विजेता भएर पदकसहित ५ लाख रुपैयाँ प्राप्त गर्नुहुनेछ ।

प्रतियोगितासँगै शारीरिक सुगठन क्षेत्रको विकास र विस्तारका लागि योगदान गर्ने खेलाडीहरुलाई सम्मान प्रदान गर्ने वडाको योजना छ ।