प्रहरीको आत्मबल बढाउन काठमाडौँ महानगरपालिका वडा नं. २ अध्यक्ष र जनसमुदायको सहयोग

काठमाडौँ । जेनजी आन्दोलनका क्रममा ध्वस्त भएको प्रहरी वृत्त दरवारमार्गलाई सहयोग जुटाउने कार्य सुरु भएको छ । यसक्रममा काठमाडौँ महानगरपालिका वडा नं. २ का अध्यक्ष राजेन्द्र कुमार श्रेष्ठले व्यक्तिगत रूपमा पचास हजार रूपैयाँ प्रदान गर्नुभएको छ ।

साथै, सामुदायिक प्रहरी सेवा केन्द्र नील सरस्वतीस्थान लाजिम्पाट, खुर्सानीटार टोल सुधार समाजलगायत स्थानीयवासीले समेत प्रहरी वृत्तलाई सहयोग गर्दै आएका छन् । अध्यक्ष श्रेष्ठले शान्ति सुरक्षा कायम राख्न प्रहरीको आत्मबल बढाउन यतिखेर सबैको सहयोग अपरिहार्य रहेको बताउनुभयो ।

सामुदायिक प्रहरी सेवा केन्द्रका महासचिव प्रेमबहादुर श्रेष्ठका अनुसार हालसम्म वडा नं. २ का जनप्रतिनिधि र स्थानीयवासीको पहलमा एक लाख चालीस हजार रूपैयाँ सङ्कलन भइसकेको छ । सङ्कलित रकमबाट ल्यापटप, प्रिन्टर, १४ वटा मल्टिप्लग, रजिस्टरलगायत स्टेसनरी सामग्रीहरू प्रहरी वृत्तलाई हस्तान्तरण गरिएको छ । ‘‘अन्य वडाका दिदीबहिनी समूहहरूबाट पनि सहयोग आउँदैछ, प्राप्त रकमअनुसार आवश्यक सामग्री उपलब्ध गराइनेछ,’’ उहाँले बताउनुभयो ।

त्यस्तै, खुर्सानीटार टोल सुधार समाजले प्रहरी वृत्तलाई श्रमदानमार्फत सहयोग गरिरहेको छ । समाजले प्रहरीको मागअनुसार वाइरिङ गरेर बत्ती बालिदिएको र केही फर्निचर प्रदान  गरिरहेको समाजका अध्यक्ष विनोद मास्केले जानकारी दिनुभयो ।