एउटै कार्यक्रमबाट धेरै नागरिकलाई लाभ हुने कार्यक्रमलाई कार्यान्वयनको पहिलो प्राथमिकता दिनू - उपप्रमुख डंगोल

काठमाडौँ । काठमाडौँ महानगरपालिकाका उपप्रमुख सुनिता डंगोलले विभागीय प्रमुखहरुसँग चालु आर्थिक वर्षमा सम्पन्न कार्यक्रमबाट प्राप्त नतिजाका बारेमा समीक्षा गर्दै एउटै योजनाबाट धेरै नागरिकलाई लाभ पुग्ने कार्यक्रमलाई प्राथमिकता दिन निर्देशन दिनुभएको छ । आज उहाँकै वैठक कक्षमा विभागीय प्रमुखहरुलाई निर्देशन दिँदै उहाँले, आगामी आर्थिक वर्षको नीति, योजना तथा कार्यक्रमको आन्तरिक तयारी थाल्ने बेला भएको बताउनुभयो । 

‘आउँदो वर्षमा स्रोत अनुमान समितिले प्रदान गरेको सिमाभित्र रहेर स्मार्ट, कार्यान्वयन योग्य, धेरैलाई लाभ हुने र नीतिले निर्दिष्ट गरेका कार्यक्रम प्रस्ताव हुनुपर्छ । क्रमागत योजना घटाउँदै लैजानुपर्छ ।’ उहाँले अपेक्षित हासिल गर्ने विषयमा प्रमुख प्रशासकीय अधिकृत सरोज गुरागाईँलाई भन्नुभयो, ‘कार्यक्रम तर्जुमा गर्ने समय भएकोले कर्मचारी सरुवा नगर्नू । एउटाले अघि बढाएको काम बिचमा आएर अर्कोलाई टुङ्गोमा पु¥याउन कठिन हुन्छ ।’

बैठकमा उहाँले नतिजामुखी नीति, योजना तथा कार्यक्रम तर्जुमा गर्न योजनावद्ध काम गर्नुपर्ने बताउनुभयो । यसको तयारीका क्रममा संघ र प्रदेश सरकारसँग समन्वय गर्नु पर्ने, वैठक गर्नुपर्ने, कानुनले समय तोकेर गर्नु भनेका काम जिम्मेवारीमा पर्ने अधिकारीले समयमा सम्पन्न गर्नुपर्ने, नगर सभामा प्रस्तुत हुने आर्थिक विधेयक र विनियोजन विधेयकलाई व्यवहारिक समय सापेक्ष र व्यवहारिक बनाउन योजना गर्नु पर्ने, आउँदो वर्षको कार्यक्रममा भौतिक पूर्वाधारतर्फ ड्रइङ्, डिजाइन र लागत अनुमान भएका कार्यक्रमलाई समेट्नु पर्ने उहाँको भनाइ थियो । 

बैठकमा प्रमुख प्रशासकीय अधिकृत सरोज गुरागाईँले, प्रक्रियामा आएका फाइलहरु कतै नरोकिने गरी निर्णय प्रक्रियामा लगिएको जानकारी दिनुभयो । 

वैठकमा योजना, अनुगमन तथा मूल्याङ्कन एकाइका प्रमुख सुमित्रा लामिछाने सुवेदीले, विभागहरुले प्राप्त गरेका उपलब्धिका विषयमा प्रस्तुतिकरण गर्नुभएको थियो ।