एशिया प्यासिफिक केयर फोरममा भाग लिन उपप्रमुख थाइल्याण्ड प्रस्थान 

काठमाडौँ । काठमाडौँ महानगरपालिकाका उपप्रमुख सुनिता डंगोल दोस्रो एशिया प्यासिफिक केयर फोरमको प्यानलिष्टका रुपमा भाग लिन थाइल्याण्ड प्रस्थान गर्नुभएको छ । उहाँलाई प्रमुख प्रशासकीय अधिकृत सरोज गुरागाईँ, अन्तरराष्ट्रिय सम्बन्ध सचिवालयका प्रमुख बलराम त्रिपाठी, उपप्रमुखको सचिवालय प्रमुख सौरभ गौत्तमसहित अधिकारीले अन्तरराष्ट्रिय विमानस्थलको विशिष्ट कक्षबाट विदाइ गर्नुभएको थियो । विशिष्ट कक्षमा महिला, बालबालिका तथा ज्येष्ठ नागरिक मन्त्रालयका सचिव दिनेश भट्टराई भेट भएको थियो । उहाँ पनि कार्यक्रमका लागि प्रस्थान गर्दै हुनुहुन्थ्यो ।

भोलिदेखि सुरु हुने फोरमका कार्यक्रमअन्तर्गत उपप्रमुखले ‘केयरिङ् सिटिज’ शीर्षकमा हुने संवाद र छलफल सत्रको प्यानलिष्टका रुपमा धारणा राख्नुहुनेछ । प्यानल, लैङ्गिक उत्तरदायी सहरी योजनाका विषयमा केन्द्रीत हुनेछ । 

फोरमका छलफल प्रस्तुति र संवादहरु केयर (हेरचाह) र महिलाहरुको आर्थिक सशक्तिकरणलाई आगामी दिनमा थप शसक्त बनाउने, नीति, योजना, कार्यक्रम र लगानीका कोणबाट साझा बुझाइ निर्माणमा लक्षित हुनेछन् । ‘केयर इकोनोमी’ का सफल र असल अभ्यासहरुको आदानप्रदान हुनेछन् । महिला सशक्तिकरणको एशिया प्यासिफिक क्षेत्रमा विद्यमान सोचको पुस्तान्तरण, यसको रुपान्तरणमा महिलाहरुको आर्थिक सशक्तिकरण, रुपान्तरणका लागि निजी तथा सामुदायिक संघसंस्थाहरुको दायित्व, लगानी र भूमिका, केयर  इकोनोमी (हेरचाह अर्थतन्त्र) देखि केयर सिस्टम (हेरचाह प्रणाली) सम्मको चक्रमा केयर इन्टरप्रेनरसिप (हेरचाह उद्यमशीलता) लगायत विषय उठान हुनेछन् । 

फोरममा उपप्रमुखले, लैङ्गिमैत्री सहरका लागि पूर्वाधार निर्माण गर्ने तथा सेवा प्रवाह गर्ने दिशामा महानगरपालिकाले सञ्चालन गरेका कार्यक्रमका बारेमा जानकारी दिनुहुनेछ । आगामी सम्भावित कार्यक्रम र अपेक्षित उपलब्धीका विषयमा धारणा राख्नुहुनेछ । यस्तै भौतिक पूर्वाधार, सामाजिक र सांस्कृतिक पक्षसँग केयर योजनाको सम्बन्ध बारेमा धारणा राख्नुहुनेछ । 

यो विषय प्यानलमा उठान हुने विषय, सोधिने प्रश्न र अन्तरक्रियाको दिशाले निर्धारण गर्नेछ ।