खेलले वडाको पहिचानमा योगदान दिएको निष्कर्षसहित जिल्लाव्यापी वृहत खेलकुद प्रतियोगिता समापन 

काठमाडौँ । असार १ गतेदेखि लैनचौरमा सुरु भएको जिल्लाव्यापी वृहत खेलकुद प्रतियोगिता शनिवार समापन भएको छ । महानगरपालिकाको वडा नम्बर २६ ले आयोजना गरेको प्रतियोगितामा महानगरपालिकाका वडाहरुसँगै जिल्लाका करिब १ हजार खेलाडीले विभिन्न ५ वटा विधामा प्रतिस्पर्धा गरेका थिए । समापन अवसरमा फुटसल खेल खेलाइएको थियो । नकआउटका आधारमा खेलाइएको खेलबाट फाइनलमा पुगेका तारकेश्वर नगरपालिकाको टीम र महानगरपालिकाको वडा नम्बर ५ को टीमले अन्तिम प्रतिस्पर्धा गरेका थिए । ४० मिनेट खेलाइएको खेलको पहिलो हाफमा वडाको टीमले १ गोल गरेको थियो । दोस्रो हाफमा नगरपालिकाको टीमले १ गोल गरेपछि बराबरीमा पुगेका टीममा पेनाल्टी सुट गराइएको थियो । यसमा तारकेश्वर नगरपालिकाको टीम बिजेता बनेको थियो । खेलको विजेता टोलीलाई महानगरपालिकाका उपप्रमुख सुनिता डंगोल र वडाध्यक्ष ख्यामराज तिवारीले नगद १ लाख ५० हजार रुपैयाँसहित पुरस्कृत गर्नुभएको थियो । 

उपविजेता टीमलाई तारकेश्वर नगरपालिकाका प्रमुख कृष्णहरि महर्जन र वडा २६ का अध्यक्ष तिवारीले ७५ हजार रुपैयाँ नगदसहित पुरस्कार, ट्रफी र प्रमाण पत्र प्रदान गर्नुभएको थियो । खेलमा उत्कृष्ट खेलाडी, सर्वाधिक गोलकर्ता र उत्कृष्ट गोलरक्षक १० हजार रुपैयाँका दरले पुरस्कृत गरिएको थियो । 

टेवुलटेनिसमा ४० वर्ष उमेरमाथिका भेट्रान पुरुष, भेट्रान महिलासँगै अन्य विभिन्न उमेर समूहका खेलाडीहरुले प्रतिस्पर्धा गरेका थिए । यस खेलमा तारकेश्वर नगरपालिका, कीर्तिपुर नगरपालिकासहित महानगरपालिकाका १७ वटा टीम सहभागी थिए । प्रतियोगिताका विजेता दोस्रो र तेस्रो स्थान हासिल गर्नेलाई क्रमशः २० हजार, १० हजार र ५ हजार रुपैयाँसहित पुरस्कार प्रदान गरिएको थियो । 

तेक्वान्दोतर्फ १० तौल समूहमा २८० जना खेलाडीले प्रतिस्पर्धा गर्नुभएको थियो । खेलका विजेता दोस्रो र तेस्रो टीमलाई क्रमशः ७५ हजार, ५० हजार र २५ हजार रुपैयाँसहित पुरस्कृत गरिएको थियो । कराँतेका २ विधा थिए । डब्लु. के. एफ. कराँते प्रतियोगिता महिला खेलाडीहरुका बिचमा प्रतिस्पर्धा भएको थियो । यसमा एकल प्रतियोगितामा पहिलो, दोस्रो र तेस्रो हुनेलाई क्रमशः ३० हजार रुपैयाँ, १५ हजार रुपैयाँ र १० हजार रुपैयाँ नगदसहित पुरस्कार प्रदान गरिएको थियो । टीम विजेता पहिलो दोस्रो र तेस्रोलाई क्रमशः ५० हजार, २५ हजार र २० हजार रुपैयाँ नगदसहित पुरस्कृत गरिएको थियो । सामान्यतयाः कराँते एकल खेलाडीहरुका बिचमा हुने प्रतिस्पर्धा हो । यसपटक समूहगत प्रतिस्पर्धा गराइएको हो । 

फुल कन्ट्याक्ट क्योकुसिन कराँते (आइ. के. यु) विभिन्न तौल समूहमा खेलाइएको थियो । यसमा पुरुष खेलाडीहरुका बिच प्रतिस्पर्धा गराइएको थियो । प्रतिस्पर्धामा पहिलो, दोस्रो र तेस्रो हुनेलाई क्रमशः १० हजार, ८ हजार, ६ हजार रुपैयाँसहित पुरस्कृत गरिएको थियो । सान्त्वाना पुरस्कारमा ५ हजार रुपैयाँ नगदसहित पुरस्कृत गरिएको थियो । 

वडाले चालु आर्थिक वर्षमा खेलकुदका लागि ३५ लाख रुपैयाँ विनियोजन गरेको छ । 

पुरस्कार वितरणपछि खेलका बारेमा संक्षिप्त प्रतिक्रिया दिँदै महानगरपालिकाका उपप्रमुख सुनिता डंगोलले, महानगरपालिकाले वडागत र केन्द्रीय स्तरमा खेलकुदका कार्यक्रम सञ्चालन गरिरहेको बताउँदै खेललाई समावेशी, पहुँचयुक्त बनाउने दिशामा ध्यान दिएको बताउनुभयो ।

कार्यक्रम समापन गर्दै वडाध्यक्ष एवं सुशासन समितिका संयोजक ख्यामराज तिवारीले, स्वास्थ्य, सामाजिक सद्भाव र अनुशासन अभिवृद्ध गर्न खेल क्षेत्रले ठुलो योगदान दिने बताउँदै यस वर्षको सिकाइबाट अर्को वर्ष थप खेललाई थप विस्तार गरिने योजना सुनाउनुभयो । वडाभित्रै खेलका पूर्वाधार प्रशस्त भएकोले खेल आयोजना गर्न कठिन नभएको उहाँको भनाइ थियो । 

सम्पन्न खेलले वडाको पहिचान प्रवर्धनमा ठुलो भूमिका खेलेको महसुस भएको छ । कार्यक्रममा खेलका संयोजक एवं वडा सदस्य प्रवेश श्रेष्ठले, वडावासी र स्थानीयबासीमा खेलप्रतिको उत्साह बढेको अनुभूति भएको बताउनुभयो । 

समापन अवसरमा स्थानीय सांस्कृतिक कार्यक्रम समेत आयोजना गरिएको थियो ।