पूर्व वडाध्यक्ष वैद्यको निधन : पशुपति आर्यघाटमा अन्येष्टि

काठमाडौँ । काठमाडौँ महानगरपालिका वडा नम्बर ८ का पूर्व वडाध्यक्ष सुवर्ण वैद्यको आज पशुपति आर्यघाटमा अन्येष्टि गरिएको छ । अन्येष्टि हुनुअघि श्रद्धाञ्जलीका लागि उहाँको पार्थिव सरीर वडा कार्यालय राखिएको थियो । उहाँको पार्थिव सरीरमा वडाध्यक्ष आशामान संगतसहित जनप्रतिनिधिहरु, कर्मचारीहरु, नगर प्रहरीले श्रद्धाञ्जली अर्पण गर्नुभएको थियो ।  उहाँप्रति श्रद्धाञ्जली अर्पण गर्न विभिन्न राजनीतिक दलका नेता पुग्नुभएको थियो । यस्तै  वडावासीको बाक्लो उपस्थिति थियो । 

पदमा रहँदा वैद्यले पुर्‍याउनु भएको योगदान र सामाजिक क्षेत्रमा गर्नुभएको सेवाप्रति सम्मान प्रकट गर्दै वडाले आज शोक विदा दिएको थियो । 

असार ५ गते जयबागेश्वरीमा सडक पार गर्दागर्दै उहाँलाई ट्याक्सीले ठक्कर दिएको थियो । वडा नम्बर ८ का अध्यक्ष आशामान संगतका अनुसार दुर्घटनापछि उपचारका लागि काठमाडौँ मेडिकल कलेज सिनामंगल लगिएको थियो । उपचारकै क्रममा असार ७ गते साँझ वैद्यको निधन भएको हो ।

२००६ साल असोज १५ गते जन्मनु भएका वैद्य २०३९ साल र २०४४ सालमा वडा अध्यक्षका रुपमा निर्वाचित हुनुभएको थियो । २०६१ सालमा तत्कालीन राजाको शासनमा उहाँलाई वडाध्यक्षकै रुपमा मनोनित गरिएको थियो । राजनीतिसँगै उहाँ सामाजिक क्षेत्रमा सक्रिय हुनुहुन्थ्यो । उहाँ पशुपति आर्यघाटमा घाटे बैद्यका रूपमा समेत रहनुभएको थियो ।