पीएल सिंह मेमोरियल टी-२० को आठौँ र नवौँ खेलमा पोखरा र वीरगञ्ज महानगरपालिका विजयी

काठमाडौँ । राजधानीको त्रिभुवन विश्वविद्यालय अन्तर्राष्ट्रिय क्रिकेट मैदानमा जारी पीएल सिंह मेमोरियल टी-२० कप क्रिकेट प्रतियोगिता अन्तर्गत आज सम्पन्न खेलहरूमा पोखरा महानगरपालिका र वीरगञ्ज महानगरपालिकाले उत्कृष्ट प्रदर्शन गर्दै महत्वपूर्ण जित दर्ता गरेका छन् । 

प्रतियोगिताको आठौँ खेलमा पोखरा महानगरपालिकाले भरतपुर महानगरपालिकामाथि ६ विकेटको रोमाञ्चक जित हात पारेको छ । खेलमा भरतपुर महानगरपालिकाले टस जितेर पहिले ब्याटिङ गर्ने निर्णय लिएको थियो । पहिले ब्याटिङ गरेको भरतपुरले १८.४ ओभरमा सबै विकेट गुमाउँदै १२३ रन मात्र बनाउन सक्यो । 

भरतपुरका लागि ओपनर शुभ कंसाकारले २२ बलमा ३० रनको सर्वाधिक योगदान दिनुभयो । सूर्यन्शु कोइराला, गौतम केसी र योगेश बहादुर भाटले समान १७-१७ रन जोड्नुभयो । पोखराका बलरहरू सुदिप अर्यालले २, अपराजित पौडेलले २, कृष्ण पौडेलले २ र सुवास भण्डारीले २ विकेट लिँदै भरतपुरको ब्याटिङ लाइनअपलाई सस्तैमा समेट्नुभयो । १२४ रनको विजयी लक्ष्य पछ्याएको पोखरा महानगरपालिकाले १८.१ ओभरमा ४ विकेट गुमाउँदै १२९ रन बनाएर लक्ष्य सहजै पूरा गर्‍यो । पोखराको जितमा मुस्कान थापा मगरले उत्कृष्ट इनिङ खेल्दै ४६ बलमा अविजित ५१ रनको अर्धशतकीय योगदान दिनुभयो । उहाँ नै खेलको ‘प्लेयर अफ दि म्याच’ घोषित हुनुभयो । 

प्रतियोगिताको नवौँ खेलमा वीरगञ्ज महानगरपालिकाले विराटनगर महानगरपालिकालाई ५८ रनको फराकिलो अन्तरले पराजित गर्दै प्रतियोगितामा आफ्नो बलियो उपस्थिति प्रमाणित गरेको छ । 

खेलमा वीरगञ्ज महानगरपालिकाले टस जितेर पहिले ब्याटिङ गर्ने निर्णय गर्दै निर्धारित २० ओभरमा ८ विकेट गुमाएर १३५ रनको चुनौतीपूर्ण योगफल खडा गर्‍यो । वीरगन्जका लागि अलराउन्डर पवन सर्राफले आक्रामक ब्याटिङ गर्दै ४४ बलमा ६३ रनको उत्कृष्ट अर्धशतकीय पारी खेल्नुभयो भने अनिल कुमार साहले १७ रनको योगदान दिनुभयो । विराटनगरका बलर प्रतिक पोखरेल र दिपेश कँडेलले समान २-२ विकेट लिनुभयो । १३६ रनको लक्ष्य पछ्याएको विराटनगर महानगरपालिका वीरगन्जको कडा र कसिलो बलिङ आक्रमण सामु निरीह देखिँदै १८ ओभरमा मात्र ७७ रनमा अलआउट हुन पुग्यो । विराटनगरका लागि प्रेम कामतले अविजित २३ रन र दिपेश कँडेलले १५ रन बनाउनु बाहेक अन्य ब्याटरले दोहोरो अंक छुन सकेनन् । विराटनगरलाई सस्तैमा समेट्ने क्रममा वीरगञ्जका बलर विशाल पटेलले घातक बलिङ गर्दै ४ ओभरमा मात्र १० रन खर्चेर ४ महत्वपूर्ण विकेट लिनुभयो । ब्याटिङमा चम्किएका पवन सर्राफले बलिङमा पनि आफ्नो जादु देखाउँदै ४ ओभरमा १५ रन खर्चेर ३ विकेट चट्काउनुभयो । ब्याटिङ र बलिङ दुवै विधामा उत्कृष्ट प्रदर्शन गरेका वीरगन्जका पवन सर्राफ खेलको ‘प्लेयर अफ दि म्याच’ चुनिनुभयो ।

छैटौँ खेलमा पोखरा महानगरपालिकाले र सातौँ म्याचमा विराटनगर महानगरपालिकाले जित दर्ता गरेका छन् । पोखराले काठमाडौँलाई ६ रनले र विराटनगरले ललितपुर महानगरपालिकालाई ८ विकेटले पराजित गरेका हुन् । 

असार ५ गते त्रिभुवन विश्वविद्यालय अन्तर्राष्ट्रिय क्रिकेट मैदानमा प्रतिस्पर्धा चलिरहेको छ । उद्घाटन खेल काठमाडौँ महानगरपालिका र ललितपुर महानगरपालिका बिच भएको थियो । यस खेलमा काठमाडौँ महानगरपालिकाले ललितपुर महानगरपालिकालाई ६ विकेटले पराजित गरेको थियो । दोस्रो दिनको पहिलो खेलमा भरतपुरद्वारा वीरगञ्ज ७४ रनले र दोस्रो खेलमा पोखराद्वारा विराटनगर ९ विकेटले पराजित भएका थिए । तेस्रो दिनको पहिलो खेलमा काठमाडौँ महानगरपालिकाले वीरगञ्ज महानगरपालिकामाथि ६ विकेटको सहज जित दर्ता गर्‍यो । त्यस दिनको दोस्रो खेलमा ललितपुर महानगरपालिकाले भरतपुर महानगरपालिकालाई ४ विकेटले पराजित गर्दै रोमाञ्चक जित निकाल्यो । 

भोलि विहान ९ बजे ललितपुर महानगरपालिकाका विरुद्ध वीरगञ्ज महानगरपालिका र दिउँसो १ बजे भरतपुर महानगरपालिका विरुद्ध काठमाडौँ महानगरपालिका बिच खेल हुँदैछ । 

काठमाडौँ महानगरपालिकाले आयोजना गरेको अन्तर महानगर टी-२० खेल आन्तरिक प्रतियोगितामध्ये सबैभन्दा धेरै राशीपुरस्कार भएको खेल हो । यसका विजेताले ११ लाख रुपियाँ र उपविजेता टीमले ५ लाख रुपियाँ नगदसहित पुरस्कार प्राप्त गर्नेछ । यस्तै वेष्ट बलर, वेष्ट वाट्स म्यान, प्लेयर अफ द टुर्नामेन्टलाई जनही ५ हजार रुपियाँसहित पुरस्कृत गरिनेछ । 

यस वर्षको प्रतियोगितामा काठमाडौँ, ललितपुर, पोखरा, भरतपुर, विराटनगर र वीरगञ्ज गरी ६ वटा महानगरपालिकाबाट राष्ट्रिय खेलाडीसहितको टोली प्रतिस्पर्धामा हुनुहुन्छ । नेपाल सिनियर, नेपाल ए को सिनियर टीमबाट खेलेका, नेपाल अन्डर नाइन्टीन र अन्डर सिक्सटीनबाट खेलेका खेलाडीहरुले प्रतियोगितामा भाग लिएका छन् ।