सम्पदा भवन निर्माण तथा सहुलियत कार्यविधिको मस्यौदा सम्पदा तथा पर्यटन समितिलाई बुझाइयो

काठमाडौँ । ‘सम्पदा भवन संरक्षण एवं निर्माण मापदण्ड तथा सहुलियत कार्यविधि २०७८ को संशोधन मस्यौदा तयारी कार्यदल’ले आज मस्यौदाको प्रतिवेदन सम्पदा तथा पर्यटन समितिमा वुझाएको छ । सहरी योजना आयोगका सदस्य बाबुराम भट्टराईको संयोजकत्वमा गठित कार्यदलले समितिका संयोजक आशामान संगतलाई मस्यौदाको प्रतिवेदन बुझाएको हो । 

मस्यौदा बुझिसकेपछि संयोजक संगतले भन्नुभयो, ‘काठमाडौँको सांस्कृतिक महत्व दृश्यमा प्राप्त गर्न मौलिकता प्रवर्धन हुने भवन निर्माणलाई सहुलियत प्रदान गर्न खोजेका छौँ ।’ त्यस क्रममा मस्यौदा समितिका संयोजक भट्टराईले, ‘अवस्था र आवश्यकताको अध्ययन तथा स्थानीय र सरोकारवालाको पृष्ठपोषण लिएर संशोधन मस्यौदा तयार पारिएको हो ।’

महानगरपालिकाको भौगोलिक क्षेत्रभित्र भएका बास्तुकलात्मक महत्वका सांस्कृतिक तथा ऐतिहासिक भवनहरुको मौलिकता जोगाउन महानगरपालिकाले गर्ने अगुवाइ तथा सहयोग यस संशोधनका मुख्य विषय हुन् । भवनहरु निजी र संस्थागत जुनसुकै पनि हुन सक्छन् । भवनको मौलिकता कायम राखेर गरिने  संरक्षण, जीर्णाेद्धार वा आवरण मर्मत सुधार कार्यका लागि सहयोग हुनेछ । यसरी प्रदान गरिने सहुलियतले घरधनीलाई परम्परागत मौलिक स्वरुपमा भवन निर्माण गर्न प्रोत्साहन हुनेछ । संशोधन प्रस्तावमाथिको छलफलमा अधिकारीहरुले धारणा राख्नुभयो । 

कार्यदलमा शोभा मानन्धर, सन्तोष पाण्डे, हरि वाग्ले (काफ्ले) आनन्द मानन्धर, अनुपराज ढुङ्गाना सदस्य र श्रृजमैयाँ प्रधान सदस्यसचिव हुनुहुन्थ्यो ।