१ लाख रुपैयाँ नगदसहित गोल्डेन पिक मा. वि. वडास्तरीय बास्केटबल प्रतियोगिताको विजेता 

काठमाडौँ । काठमाडौँ महानगरपालिका वडा नं. ६ ले आयोजना गरेको विद्यालय स्तरीय वडाध्यक्ष कप पहिलो बास्केटबल प्रतियोगितामा ४६ स्कोरसहित गोल्डेन पिक माध्यमिक विद्यालय विजेता बनेको छ । यही टिमका सोनाम शेर्पाले बेस्ट स्कोरर उपाधि प्राप्त गरे । फागुन ९ गते सम्पन्न फाइनल खेलमा मंगलदीप माध्यमिक विद्यालयलाई पराजित गर्दै गोल्डेन पिक विजेता बनेको हो । मंगलदीपले ३६ स्कोर गरेको थियो । प्रतियोगिताका विजेतालाई वडाध्यक्ष भुवन लामाले, नगद १ लाख रुपैयाँ, फस्ट रनर अपलाई ५० हजार नगद सहित ट्रफी, मेडल र प्रमाण पत्र प्रदान गर्नुभएको थियो । 

१२ वटा टिम सहभागी खेल धुन्कमाण्डु, सिमलटारमा भएको थियो । खेल नकआउट प्रणालीबाट खेलाइएको थियो । 

कार्यक्रम समापन अवसरमा वडाध्यक्ष भुवन लामाले, युवाहरुको सिर्जनात्मक उर्जालाई जोगाउन र सहरी स्वास्थ्यको प्रवर्धन गर्न वडाले खेलकुदका कार्यक्रमलाई प्राथमिकतामा राखेको बताउनुभयो । खेललाई सद्भावयुक्त सामाजिक व्यवस्थापनको औजारका रुपमा प्रयोग गर्न सकिने उहाँको भनाइ थियो । 

विधागत खेलमार्फत बालबालिकाको चौतर्फी विकासका योजना क्रमशः कार्यान्वयन भइरहेका छन् । कार्यक्रममा वडा सदस्य नरेन्द्रकुमार थापाले धारणा राख्नुभयो । 

वडासचिव कमल गौत्तमका अनुसार खेलमा सबैभन्दा धेरै ६२ स्कोर भएको थियो । छैटौँ खेलमा यो स्कोर गोल्डेन पिकले बौद्ध चिल्ड्रेन स्कूलविरुद्धको खेलमा गरेको थियो ।