महानगरपालिकासँग सहकार्य गर्ने संघसंस्थाको लेखा प्रणाली प्रचलित व्यवस्थाअनुसार हुनुपर्ने 

काठमाडौँ । काठमाडौँ महानगरपालिकाको आन्तरिक लेखा परीक्षण एकाइले महानगरपालिकासँगको सहकार्यमा कार्यक्रम सञ्चालन गर्ने संघसंस्थालाई प्रचलित लेखा व्यवस्थापन प्रणाली अनिवार्य पालना गर्न आग्रह गरेको छ । शुक्रबार सामाजिक क्षेत्रको काम गर्ने संघसंस्थाका पदाधिकारीमध्ये कोषाध्यक्ष र लेखा व्यवस्थापन गर्ने कर्मचारीहरुलाई अभिमुखीकरण प्रदान गर्दै यस्तो आग्रह गरेको हो । 

कार्यक्रममा एकाइका प्रमुख यादव घिमिरेले भन्नुभयो, ‘लक्षित वर्गमा सामाजिक विकासका कार्यक्रम सञ्चालन गर्दा वित्तीय अनुशासनलाई पूर्ण कार्यान्वयन गराउन सकियोस्, भुक्तानी प्रक्रियालाई सहज बनाउन सकियोस् भन्ने महानगरपालिकाको चाहना हो । यसका लागि सार्वजनिक खर्च प्रणाली र महानगरपालिकाले अवलम्बन गरेका वित्तीय सुशासनका प्रक्रियाका बारेमा सहकार्य गर्ने सबैलाई थाहा हुन जरुरी छ ।’ 

अभिमुखीकरण कार्यक्रममा सामाजिक विकास कार्यक्रमको अधिकार क्षेत्र, सहभागी छनोट विधि र प्रक्रिया लगायत विषयमा प्रस्तुतिकरण र अन्तरक्रियात्मक छलफल भएको थियो । 

यस क्रममा सहकार्यका क्षेत्र, सहकार्य गर्ने प्रस्ताव, कार्यक्रम स्वीकृत हुने प्रक्रिया, स्वीकृत कार्यक्रम सञ्चालन गर्ने प्रक्रिया, भुक्तानी प्रक्रियामा पेश्की लिने, किस्ताको भुक्तानी लिने, अन्तिम भुक्तानी प्रक्रियाका विषयमा जानकारी दिइएको थियो । यसरी सञ्चालन हुने प्रक्रियामा चाहिने कागजपत्र, कार्य सम्पादन हुने अवधिका जानकारी दिने विषयका रुपमा समावेश थिए । यसरी प्रदान गरिएका सूचनाबाट सहकार्य गर्ने संघसंस्थाहरुले प्रक्रियागत झञ्झट र सम्पन्न कामको भुक्तानीमा समस्या झेल्नु नपर्ने महानगरपालिकाको अपेक्षा छ ।  

गैर सरकारी संघसंस्थाहरुले स्वास्थ्य सेवा, वातावरणीय सुधार, महिला, बालबालिका र ज्येष्ठ नागरिकको अधिकार, समावेशीकरण, पहुँच वृद्धि, शिक्षा, सचेतना, युवालगायतका क्षेत्रमा काम गरिरहेका छन् । चालु आर्थिक वर्षमा काठमाडौँ महानगरपालिकाको सामाजिक विकास विभागले १ हजार ३३६ वटा सामाजिक संघसंस्था नविकरण गर्न शिफारिस गरेको छ । यस्तै ५९ वटालाई नयाँ दर्ताका लागि शिफारिस गरिएको विभागका प्रमुख समीक्षा निरौलाले जानकारी दिनुभयो । 

२०७८ को राष्ट्रिय जनगणनाको तथ्याङ्क अनुसार काठमाडौँ महानगरपालिकाको जनसंख्या ८ लाख ६२ हजार ४ सय जना रहेको छ । यसमा ४९.१९ प्रतिशत महिला, २७.२ प्रतिशत बालबालिका र ९.८१ प्रतिशत ज्येष्ठ नागरिकको संख्या छ ।