वडा १६ बन्यो वडास्तरीय फुटसलको विजेता : वडा नं. १२ उपविजेता

काठमाडौँ । प्रयागराज सिंह सुवाल स्मृति अन्तर वडा फुटसल प्रतियोगितामा वडा नं. १६ विजेता बनेको छ । लैनचौर फुटसल मैदानमा बुधबार भएको फाइनल खेलमा वडा नं. १६ ले वडा नं. १२ लाई ५-२ गोल अन्तरले जितेको हो । १६ का लागि आयुष कुँवर, रविन निरौला, साजन डङ्गोल र श्रेयान्स मानन्धरले गोल गर्नुभएको थियो । वडा १२ को एउटा आत्मघाती गोल उपहार पाएर वडा नं. १६ को ५ गोल भएको हो । वडा नं. १२ का लागि मनोज महर्जन र सिद्धार्थ देउलाले गोल गर्नुभएको थियो । 

उपाधिसँगै विजेता टोली वडा नं. १६ ले २ लाख रुपियाँ प्राप्त गर्‍यो । उपविजेता वडा नं. १२ ले १ लाख रुपियाँ पुरस्कार पायो । वडा नं. १६ का आयुष कुँवर सर्वाेकृष्ट खेलाडी र मनोज महर्जन सर्वाधिक गोलकर्ता बन्नुभयो । यस्तै वडा नं. १६ का सुशान्त महत उत्कृष्ट गोलकिपर बन्नुभयो । उत्कृष्ट सबैलाई जनही १० हजार रुपैयाँ नगद पुरस्कार प्रदान गरियो । 

असोज १ गतेबाट सञ्चालित प्रतियोगिताको समापन खेलमा खेलाडीहरुलाई हौसला प्रदान गर्न महानगरपालिकाका प्रमुख बालेन्द्र शाह (बालेन) खेल मैदानमा जानुभएको थियो । खेल समापन अवसरमा महानगरपालिकाका प्रमुख प्रशासकीय अधिकृत सरोज गुरागाइँ र वडा नं. २३ का अध्यक्ष एवं विधायन समितिका संयोजक मचाराजा महर्जनले पुरस्कार प्रदान गर्नुभएको थियो । 

यस क्रममा महर्जनले प्रयागराजसिंह सुवाललाई सम्झना गर्दै भन्नुभयो, ‘२००७ सालमा प्रजातन्त्र स्थापना भएपछि सम्पन्न निर्वाचनबाट वडाध्यक्ष पदमा निर्वाचित सुवाल एनआरटी क्लवको संस्थापक हुनुहुन्थ्यो । उहाँको स्मरणीय राजनीतिक, खेल र सामाजिक क्षेत्रको योगदानलाई बचाइ राख्न फुटसल खेलको मद्दत गर्नेछ ।’

२०८० सालबाट प्रतियोगिता सुरु भएको हो । यसपटकको खेलमा वडा नं. ७ र २४ बाहेक अरु सबै वडा र महानगरपालिका केन्द्रबाट एउटा गरी ३१ वटा टीमले भाग लिएका थिए । नकआउटका आधारमा भएको खेल हरेक दिन विहान ८ बजेदेखि १२ बजेसम्म सञ्चालन भएको थियो ।

प्रतियोगितामा ३५० युवाले प्रत्यक्ष प्रतिस्पर्धा गरेका थिए । खेल सञ्चालन र व्यवस्थापन गर्न ५ सय युवा परिचालित भएका थिए ।