व्यापार संघमा आवद्ध र स्वतन्त्र व्यवसायीलाई वडा नं. २२ बाट व्यवसाय दर्ता र शीर्षकगत करका विषयमा अभिमुखीकरण

काठमाडौँ । करदाताले दोहोरो कर तिर्नु नपरोस्, तिर्नु पर्ने कर दायित्वका विषयमा जानकारी होस् भनेर वडा स्तरीय करदाता शिक्षा कार्यक्रम सञ्चालन थलिएको वडा नम्बर २२ का अध्यक्ष एवं महानगरपालिकाको स्वास्थ्य शिक्षा समितिका संयोजक चिनीकाजी महर्जनले बताउनुभएको छ । वडाभित्र रहेका व्यापार संघसँग आवद्ध र स्वतन्त्र व्यवसायीहरुलाई भेला गरेर व्यवसाय दर्ता, नविकरण तथा लेखा र राजस्व सम्बन्धी जानकारी दिने क्रममा उहाँले यस्तो बताउनुभएको हो । 

‘आय, व्यवसाय र पेशाअनुसार करदाताले फरक फरक ठाउँमा कर तिर्नु बुझाउनुपर्छ । यसरी कर, शुल्क, दस्तुर तथा राजस्व बुझाउँदा करदाताले अन्योल हुनु नपरोस् । कर तिर्ने करदाताहरुले प्राप्त गर्ने छुटसहितका सुविधा छन् । ती सुविधा सजिलै प्राप्त गर्ने वातावरण बन्न सकोस् ।’ महर्जनले भन्नुभयो, ‘हामी यसका लागि काम गरिरहेका छौँ ।’

कार्यक्रममा आन्तरिक राजस्व कार्यालयका प्रमुख युवराज बस्नेत, महानगरपालिकाको वित्त विभागका प्रमुख डा. शिवराज अधिकारीसहित पदाधिकारीहरुले कर र करका सिद्धान्त, सरकार र व्यवसायीका दायित्वसँगै स्थानीय सरकारलाई तिर्नु बुझाउनु पर्ने बिज्ञापन कर, मनोरञ्जन कर, घरबहाल कर, सम्पत्ति कर, व्यवसाय करका विषयमा प्रस्तुतिकरण र छलफल भएको थियो ।  

वडा नम्बर २२ क्षेत्र महानगरपालिकाभित्रको प्रमुख व्यवसायिक स्थानमध्येको एउटा हो । नयाँ सडक, शुक्रपथ, खिचापोखरी, सुन्धारालगायत स्थान व्यापारिक क्रियाकलापकै कारण परिचित छन् । 

वडा सचिव ज्ञानेन्द्र विवशका अनुसार वडाभित्र ९ हजार १५० व्यवसाय दर्ता छन् । वडामा ३ हजार १३ जना सम्पत्ति करदाता छन् ।