बछलेश्वरी फल्चा र डवलीसँगै लंका रावण पाटी उद्घाटन

काठमाडौँ । काठमाडौँ महानगरपालिका वडा नम्बर ८ ले बछलेश्वरी जात्राका लागि फल्चा र डवली (दवु) निर्माण गरेको छ । पाशुपत क्षेत्रको प्रसिद्ध जात्रा भइकन पनि यसको आफ्नै फल्चा थिएन । यसकारण जात्राको व्यवस्थापनलाई सहज बनाउन फल्चा निर्माण गरिएको वडाध्यक्ष एवं महानगरपालिकाको सम्पदा तथा पर्यटन समितिका संयोजक आशामान संगतले जानकारी दिनुभयो । फल्चासँगै विहीबार वडाध्यक्ष संगतले रावण पाटीको पनि उद्घाटन गर्नुभयो । 

‘फल्चा र डवली निर्माण गरिएको स्थान सार्वजनिक जग्गा हो । पशुपति क्षेत्र विकास कोषले मोही खडा गरेर व्यक्तिको उपयोगमा लगेको थियो । यसरी निजी प्रयोगमा भएको सार्वजनिक सम्पत्तिलाई वडाले कब्जामुक्त गरायो । यस ठाउँमा ३७ दिनमा फल्चा र डवली निर्माण कार्य सकिएको हो ।’ संगत भन्नुहुन्छ, ‘वडाले फल्चा र डवली बनाएपछि जात्रा सञ्चालन गर्ने खट गुठिले माताको मूर्ति स्थापना गराएको हो । यसबाट लिच्छविकालीन ऐतिहासिक जात्रा तथा सम्पदाको दिगो संरक्षण र उपयोगमा योगदान हुनेछ ।’ 

यसको लागत ३० लाख ८६ हजार रूपैयाँ रहेको छ । २ आना जमिनमा रहेको फल्चा २ तलाको छ । 

यस क्षेत्रमा चैत १८ गतेसम्म बछलेश्वरी, बज्रेश्वरी एवं आकाश भैरव जात्रा हुनेछ । यो जात्रा वि. सं. १९३६ सालभन्दा अगाडिबाट शुरूवात भएको मानिन्छ । 

रावण लंका फल्चा १६औँ शताब्दी संरचना मानिन्छ । फल्चा १९९० र २०७२ सालको भूकम्पबाट जीर्ण भएको थियो । ३ तले फल्चा ४४ दिनमा निर्माण सम्पन्न भएको हो ।