वडा ८ बाट दोस्रो वडाध्यक्ष कप फुटसल आयोजना : १५ गते सुरु भएको खेल २१ गते सकिने 

काठमाडौँ । काठमाडौँ महानगरपालिकाको वडा नं. ८ ले वडाध्यक्ष कप दोस्रो फुटसल प्रतियोगिता आयोजना गरेको छ । प्रतियोगितामा वडाभित्रका ६ वटा टोलीले भाग लिएका छन् । 

मंगलबार एन्फाका रेफ्रीलाई बल प्रदान गरेर खेलको उद्घाटन गर्दै महानगरपालिकाका कार्यवाहक प्रमुख सुनिता डंगोलले, वडा स्तरमा आयोजना हुने खेलका कार्यक्रमले महानगर स्तर र राष्ट्रिय स्तरका खेलकुदमा योगदान दिने अपेक्षा व्यक्त गर्नुभयो । ‘वडाभित्रको सामाजिक सम्बन्ध बलियो बनाउन पनि खेलकुदले योगदान गर्नेछ ।’ उहाँको भनाइ थियो । 

कार्यक्रममा वडाध्यक्ष एवं महानगरपालिकाको सम्पदा तथा पर्यटन समितिका संयोजक आशामान संगतले खेलमा प्रतिस्पर्धा देखिए पनि यसले खेलाडी बिचको आपसी सम्बन्धमा प्रगाढता प्रदान गर्ने विश्वाश व्यक्त गर्नुभयो । ‘युवाहरुलाई खेलप्रति आकर्षण बढाउन, स्वास्थ्य र तन्दुरुस्ती प्रवर्धन गर्न, स्थानीय खेल प्रतिभा पहिचान गर्न, सद्भाव, एकता र समूहगत कार्य प्रणालीको विकास गर्न तथा समुदायमा सकारात्मक मनोरञ्जनात्मक वातावरण बनाउन प्रतियोगिता आयोजना गरिएको हो ।’ संगतले खेल आयोजनाको उद्देश्य स्पष्ट पार्नुभयो । 

प्रतियोगितामा गुरुमार्ग (अर्चना), गौरीशंकर युवा क्लव र सिर्जनशील युवा क्लवले समूह ‘क’ बाट र सन्ध्या पुस्तकालय अमरकान्तेश्वर युवा समूह, जय वागेश्वरी युवा क्लवले समूह ‘ख’ बाट प्रतिस्पर्धा गर्दैछन् । 

उद्घाटन खेल गुरुमार्ग (अर्चना) र गौरीशंकर युवा क्लवका बिच भएको थियो । पहिलो दिनको दोस्रो खेल जय वागेश्वरी युवा क्लव र सन्ध्या पुस्तकालय बिच भएको थियो । वैशाख १५ गते सुरु भएको खेल २१ गते सकिनेछ ।