न्यायिक निर्णयमा हार्ने व्यक्तिले मलाई हराए भन्ने मानसिकता बनाउने भएकोले यसबाट दिगो समाधान हुँदैन - उपप्रमुख, डंगोल

काठमाडौँ । ‘न्यायिक निर्णयमा एक पक्षले अवश्य हार्छ । हार्ने पक्षले मेरो कमजोरी थियो । मैले गल्ती नै गरेको थिएँ त्यसकारण हारेँ भन्ने सोच्दैन । उसले सोच्ने भनेको मेरो पहुँच थिएन । पैसा खर्च गर्न सकिन । भनसुन गर्न सकिन । यसकारण हारेँ । भन्ने हो ।’ स्थानीय विवाद र समाधानका क्षेत्रको अनुभव सुनाउँदै काठमाडौँ महानगरपालिकाका उपप्रमुख सुनिता डंगोलले भन्नुभयो, ‘निर्णय भनेकै हार र जित हो । हार्नेले मलाई हराए भन्ने कुरा जीवनभर सोचिरहन्छ । यसकारण विवादका पक्षका बिचमा कहिल्यै संवाद नहुने हुन सक्छ । छिमेक र टोलमा बस्ने व्यक्तिहरुका बिचमा यसप्रकारको सम्बन्ध नहोस् भन्नका लागि महानगरपालिकाले मेलमिलापका माध्यमबाट विवाद समाधानको प्रयत्न गरिरहेको छ ।’ वडा नम्बर २३ ले आज आयोजना गरेको न्यायिक संवाद कार्यक्रममा उहाँले न्यायिक निरुपणमा मेलमिलाप नै सबैभन्दा उत्कृष्ट अभ्यास भएको धारणा राख्नुभयो । 

‘वडाभित्र धेरै विवाद छैनन् ।’ वडाध्यक्ष एवं विधायन समितिका संयोजक मचाराजा महर्जनले भन्नुभयो, ‘विवाद हुनेहरुले जनप्रतिनिधिहरुसँग भेटघाट हुँदा मर्का सुनाउँछन् । जनप्रतिनिधिले दुवै पक्षको कुरा बुझेर आपसी संवाद गराएपछि सम्भावित ठुला मुद्दाको समाधान त्यहीँ निस्कन्छ । हाम्रो अभ्यासले यही देखाउँछ । मर्का महसुस गरेका धेरै व्यक्तिहरुले लिखित निवेदन दिने, मौखिक उजुरी दिने प्रक्रियामा पनि पुग्नु पर्दैन ।’

कार्यक्रममा स्थानीय विवाद निरुपणमा स्थानीय सरकारलाई प्रदान गरिएका कानुनी अधिकार, यसको प्रचलन र स्थानीय न्यायिक अधिकारमा स्थानीयबासीले लाभ लिने प्रक्रियाका विषयमा प्रस्तुतिकरण र छलफल भएको थियो ।