९ वटा खेलमा ८ अङ्क बटुल्दै बज्राचार्य वुद्धिचाल खेलका विजयी

काठमाडौँ । काठमाडौँका राजेन्द्र बज्राचार्यले ८ अङ्क बटुल्दै, नविन्द्रराज जोशी स्मृति तेस्रो फिडे र्‍यापिड (१९०० मुनि) चेस टुर्नामेन्टको विजेता हुनुभएको छ । जेठ १५ र १६ गते ९ चरणमा सम्पन्न प्रतियोगितामा समान अङ्क प्राप्त गर्नुभएका रुकुमका मिलन रोका टाइब्रेक अङ्कले दोस्रो र मोराङ्का उमेश राईले तेस्रो स्थान हासिल गर्नुभयो । यसै गरी चितवनका सन्तोष गौत्तम, पाँचथरका महेन्द्रकुमार साम्बाहाम्फे, काठमाडौँका जनार्दन श्रेष्ठ, काभ्रेका योगेश श्रेष्ठ, काठमाडौँका रमेश वीर माली, झापाका डा. सुशन गौत्तम र दोलखाका कविन्द्र शिवाकोटीले क्रमशः चौथो, पाँचौँ, छैटौँ, सातौँ, आठौँ, नवौँ र दशौँ स्थान प्राप्त गर्नुभयो । 

महिला तर्फ चितवनकी पूर्णिमा गुरुङ् ५.५ अङ्कसहित उत्कृष्ट खेलाडी बन्नुभयो । यस्तै खोटाङ्की कुसुम घिसिङ दोस्रो उत्कृष्ट र काठमाडौँकी पञ्च्या बोलल्चा तेस्रो उत्कृष्ट महिला खेलाडी बन्नुभयो । 

समापन कार्यक्रममा वडा नम्बर २४ का अध्यक्ष विनोद कुमार राजभण्डारीले पहिलो, दोस्रो, तेस्रो, चौथो र पाँचौ स्थान हासिल गर्ने खेलाडीहरुलाई नगद क्रमशः ३० हजार रुपियाँ, २० हजार रुपियाँ, १५ हजार रुपियाँ, १० हजार रुपियाँ र ८ हजार रुपियाँ सहित ट्रफी, पदक र प्रमाण पत्र प्रदान गर्नुभएको थियो । यसपछि दशौँ स्थानसम्म हासिल गर्ने खेलाडीहरुलाई जनही ६ हजार रुपियाँ प्रदान गरिएको थियो । 

हरेक प्रदेशबाट एक–एक जना उत्कृष्ट खेलाडी घोषित गरिएको थियो । यसरी उत्कृष्टता प्राप्त गर्ने खेलाडीलाई ५-५ हजार रुपियाँ प्रदान गरिएको थियो । 

प्रतियोगितामा वडा नं. २४ बाट २ जनालाई स्थानीय खेलाडी, महानगरपालिकाभित्रबाट २ जना खेलाडीलाई स्थानीय उत्कृष्ट खेलाडीका रुपमा सम्मानित गरिएको थियो । 

धर्मपथमा रहेको सांस्कृतिक द्यः छेँमा खेलाइएको खेलमा ५ वटा देशका २२६ जना खेलाडीका बिच प्रतिस्पर्धा भएको थियो । विश्व वुद्धिचाल महासंघ, एशियन चेस फेडरेसन र नेपाल चेस फेडरेसनसँगको सहकार्यमा काठमाडौँ महानगरपालिकाको वडा नं. २४ ले आयोजना गरेको प्रतियोगितामा भारत, अमेरिका, बेलायत र फ्रान्सका ११ जना नेपालका ४८ जिल्लाबाट २१५ जना खेलाडीहरु सहभागी हुनुभएको थियो । उमेरका हिसाबले ९ वर्षका सुवाङ्ग प्रधानदेखि ८० वर्षका भेट्रान खेलाडी सीताराम अग्रवाल प्रतिस्पर्धामा हुनुहुन्थ्यो । प्रतिस्पर्धामा १५ जना महिला हुनुहुन्थ्यो । 

सहभागीमध्ये ६४ जना अनरेटेड अर्थात पहिलो पटक प्रतिस्पर्धामा आउनु भएका खेलाडी हुनुहुन्थ्यो । 

‘विश्व वुद्धिचाल महासंघले विश्वाश गर्ने स्तरको खेल आयोजना गरेका कारण हामीले लगातार तेस्रो वर्षसम्म नियमित कार्यक्रम सञ्चालन गरिरहेका छौँ । यसलाई आगामी वर्षहरुमा पनि नियमितता दिनेछौँ ।’ समापन अवसरमा बोल्दै वडाध्यक्ष राजभण्डारीले भन्नुभयो, ‘स्थानीय खेलाडीलाई अन्तर्राष्ट्रिय स्तरको खेलमा सहभागी हुन पाउने अवसर सिर्जना गर्दै जानेछौँ । यस क्रममा हाम्रा अग्रज, सामाजिक तथा सांस्कृतिक पक्षलाई प्रवर्धन गर्दै लैजानेछौँ ।’

प्रतिस्पर्धाको अनुभूति साट्दै भारतीय खेलाडी पंकज श्रीवास्तवले, सौहाद्र खेल आयोजनाले आफूू आगामी प्रतिस्पर्धाका लागि उत्साहित रहेको धारणा राख्नुभयो । 

खेल, स्वीस सिस्टममा आधारित अर्थात एक जना खेलाडीले ९ जना खेलाडीसँग प्रतिस्पर्धा गरेर उच्च अङ्क प्राप्त गर्ने खेलाडी विजेता हुने प्रणालीमा खेलाइएको थियो । खेलका प्रमुख निर्णायक (इन्टरनेशनल आर्बिटर) ज्ञानेन्द्र खाइजुले खेलका बारेमा जानकारी दिँदै भन्नुभयो, ‘स्वीस लिग प्रणालीमा हरेक जितका लागि १ नम्बर प्रदान गरिन्छ । बराबर भयो ०.५ अंक प्राप्त हुनेछ । यही प्रणालीबाट खेल खेलाइएको हो ।’