सामाजिक परीक्षणको प्रारम्भिक प्रतिवेदनमा छलफल 

काठमाडौँ । काठमाडौँ महानगरपालिकाको आर्थिक बर्ष २०७८/०७९ को प्रारम्भिक सामाजिक परीक्षण प्रतिवेदन माथि छलफल भएको छ । विहीबार जेडिए भवनको सभा कक्षमा एलआर ढकाल एण्ड एशोसियटले प्रस्तुत गरेको प्रतिवेदनले औँल्याएका विभाग र वडाको अवस्था तथा सुझावका विषयमा छलफल भएको हो । 

छलफलपछि बोल्दै प्रमुख प्रशासकीय अधिकृत वसन्त अधिकारीले, सामाजिक प्रतिवेदनमा नागरिकले महानगरलाई हेर्ने दृष्टिकोण देखिनुपर्ने बताउनुभयो । ‘अन्य पालिकालाई दिए जस्तै सुझावसँग काठमाडौँको अवस्था मिल्दैन । त्यसैले हरेक विषयको सुक्ष्म अध्ययन गरेर मात्र सुझाव दिन सकिन्छ ।’ अधिकारीले भन्नुभयो, ‘सामाजिक उत्तरदायित्वसँग ट्रिपल पी अर्थात् प्रोफिट (लाभ), पिपुल (नागरिको अपनत्व) र प्लानेट (वातावरण) सामाजिक परीक्षणका विषय हुन् । यी विषयमा तथ्यगत विषय आउनुपर्छ ।’

प्रारम्भिक प्रतिवेदनमा समग्र लेखाजोखाको कार्य सम्पादन ५४.२२ प्रतिशत देखिएको छ । २४ वटा कार्य क्षेत्रमा भारित प्रगतिको कुल परिणाम १ हजार ४४६, वित्तिय प्रगतिको कुल परिणाम ८०३ र कार्यक्रम संख्यात्मक सञ्चालन परिणाम १ हजार ६५५ देखिएको छ ।