रञ्जितले लिए मोवाइलबाटै घरबाटो शिफारिस : फेसलेस गभर्नान्सको अभ्यास सफल

काठमाडौँ । वडा नं. १५ का सेवाग्राही राज्य रञ्जितको घर बाटो शिफारिस मोवाइलबाटै प्राप्त भएको छ । आज उहाँले केएमसी एपको प्रयोग गरेर शिफारिसका लागि निवेदन दिनुभयो । सेवा शुल्क तिर्नुभयो । त्यसको केही समयपछि आफ्नै मोवाइलमा शिफारिस प्राप्त गर्नुभयो । 

महानगरको एकीकृत विद्युतीय शासन सम्बन्धी प्रणालीमा रञ्जितको विवरण प्राप्त भएपछि वडा सचिव शुशिल सुवेदीले रुजु गरेर डिजिटल सिग्नेचरबाट प्रमाणीकरण गर्नुभयो । यसपछि विवरण वडाध्यक्ष ईश्वरमान डंगोलकोमा पुग्यो । त्यसमा वडाध्यक्ष डंगोलले डिजिटल सिग्नेचरसहित प्रमाणीकरण गरेपछि प्रमाणा पत्र रञ्जितको मोवाइलमा गयो । यो प्रमाण पत्र प्राप्त गरेपछि रञ्जित महानगरको फेसलेस सेवाको लाभ प्राप्त गर्ने पहिलो लाभग्राही हुनुभएको छ । 

यो प्रणालीमा इ—शिफारिस, दर्ता चलानी सेवा छन् । सेवाग्राहीले काठमाडौँ महानगरपालिकाको मोवाइल एप्लिकेसन केएमसी एपबाट आफ्ना विवरण भरेपछि ती तथ्याङ्क तथा सूचना वडा सचिवकोमा पुग्छ । त्यहाँबाट प्रक्रिया सुरु हुन्छ । यसको प्रमाणीकरणका लागि वडा सचिवहरुलाई डिजिटल हस्ताक्षर टोकन दिइसकिएको छ । 

एकीकृत विद्युतीय शासन प्रणालीका विकासकर्ता स्मार्ट पालिकाका निर्देशक मनोज भट्टराईकाअनुसार वडा तहबाट प्रवाह गर्नु पर्ने ८८ प्रकारका सेवामध्ये ४५ प्रकारका शिफारिस सेवालाई प्रणालीमा प्रविष्ट गराइसकिएको छ । यसलाई वडाबाट आफैँले सेवा थप गर्न सकिने बनाइएको छ ।