प्रमुख शाह र उपप्रमुख डंगोलसँग राजदूत फेलिसिटीको शिष्टाचार भेट

काठमाडौँ । काठमाडौँ महानगरपालिकाका प्रमुख बालेन्द्र शाह (बालेन) र उपप्रमुख सुनिता डंगोलसँग नेपालका लागि अष्ट्रेलियाका राजदूत फेलिसिटी भोल्कले शिष्टाचार भेट गर्नुभएको छ । शुक्रबार राष्ट्रिय सभा गृहमा भएको भेटका क्रममा अटिजम सचेतना प्रवर्धन कार्यक्रममा विषयमा कुराकानी भएको थियो । 

भेटका क्रममा प्रमुख शाहले सामाजिक जिम्मेवारीलाई महानगरले प्राथमिक जिम्मेवारी रुपमा ग्रहण गरेको बताउनुभयो । 

पारिवारिक र सामाजिक समस्याका रुपमा रहेको अटिजमका विषयमा सचेतना कार्यक्रममा सहकार्यप्रति आफू उत्साहित रहेको राजदूत भोल्कको भनाइ थियो । 

सांगीतिक कार्यक्रम मार्फत सचेतना अभिवृद्धि गर्न महानगरपालिका, नेपालका लागि अष्ट्रलियाको दूतावास र अटिजम केयर नेपाल सोसाइटी बिच सहकार्य गर्ने विषयमा कुराकानी केन्द्रित थियो । कार्यक्रममा अटिजम भएका बालबालिकाको प्रस्तुति रहनेछ ।  

अजिटम भएका बालबालिकाको समस्या छिटो पहिचान गर्न सकियोस । उनीहरुले पाउनु पर्ने सुविधा छिटै प्राप्त गर्न सकुन । सरकारका नीति तथा कार्यक्रममा अटिजमको विषयले प्राथमिकता पाउन सकोस । भन्ने सन्देश प्रवाह गर्नु सचेतनामूलक कार्यक्रमको उद्देश्य हो । 

सेन्टर फर डिजिट कन्ट्रोलको तथ्याङ्क अनुसार ४४ जना बालबालिकामध्ये १ जनामा अटिजम भएको देखिन्छ । यो किन र कसरी हुन्छ? कारण थाहा छैन । निको पार्न सकिँदेन । जीवनभर रहिरहन्छ । यसकारण अटिजमलाई ग्वोबल पब्लिक हेल्थ क्राइसिसका रुपमा लिइएको छ । 

अटिजम केयर नेपाल सोसाइटीका प्रशासकीय प्रमुख सुरेन्द्र बज्राचार्यका अनुसार अटिजम भएका बालबालिकाहरुलाई सामाजिक व्यवहार थाहा हुँदैन । सञ्चार क्षमता हुँदैन । जीवन चलाउन आवश्यक सीप विकास हुँदेन । यसकारण जीवन भर अभिभावकको साथ र सहयोग चाहिन्छ । 

समयमा समस्या पहिचान गर्न सकिएन भने भोलि अटिजम परिवार, समाज र देशकै लागि भार बन्न सक्छ । त्यसैले यसमा सरकारको जिम्मेवारी आवश्यक छ । बज्राचार्यका अनुसार यस विषयमा जनसाधारणमा सचेतना र सरकारलाई ध्यानाकर्षण गराउन आवश्यक रहेकोले सचेतनामुलक कार्यक्रम गर्न लागिएको हो । 

तस्विर : विनय शाक्य