महानगरका कर्मचारीको सहकारीमा ६ करोड २५ लाख १० हजार रुपैयाँ बचत संकलन 

काठमाडौं । महानगर कर्मचारी वचत तथा सहकारी सस्था लिमिटेडले आ. व. आ. व. २०७८/०७९ को अन्त्यसम्ममा ६ करोड २५ लाख १० हजार रुपैयाँ बचत संकलन भएको छ । शुक्रबार सम्पन्न साधारण सभामा संस्थाका अध्यक्ष महेश काफ्लेले प्रतिवेदन प्रस्तुत गर्दै यस सम्बन्धी जानकारी गराउनुभएको हो । महानगरमा कार्यरत १५५ जना महिला र ३५६ जना पुरुष गरी ५११ जना शेयर सदस्य रहेको सहकारीबाट २५ जना अलग हुनुभएको छ । सहकारीमा प्रति शेयर १ सय रुपैयाँका दरले १ करोड २ लाख ८० हजार रुपैयाँ चुक्ता शेयर पुँजी छ भने ७५ हजार रुपैयाँको स्थिर सम्पत्ति छ । मासिक ५ हजार रुपैयाँका दरले बचत संकलन गर्ने गरिएको छ । सहकारीले ७ करोड ८६ लाख रुपैयाँ वचत परिचालन भएको छ । 

संस्थाले बचतकर्तालाई वार्षिक ६ प्रतिशत व्याज दिने गरेको छ ।  

महानगरमा २ हजार बढी कर्मचारी हुनुहुन्छ । सहकारीका सदस्यको संख्या ५ सय छ । यो संख्या बढाएर सहकारीको आकार बढाउनु पर्छ । साधारण सभामा बोल्दै महानगरको सुशासन समितिका संयोजक एवं वडा २६ का अध्यक्ष ख्यामराज तिवारीले, महानगर सहकारीमा वित्तिय जोखिम नभएको उल्लेख गर्नुभयो ।   

सभामा सचिव उत्तम दाहालले कार्य समिति प्रतिवेदन प्रस्तुत गर्दै सहकारीमा सञ्चालक समिति, ऋण उपसमिति, शिक्षा उपसमिति, पदपूर्ति समिति, सल्लाहकार समिति र कोष परिचालन सुझाव समिति रहेको जानकारी दिनुभयो । लेखा तथा सुपरीवेक्षण समितिका संयोजक विकास चित्रकारले प्रस्तुत गर्नुभएको प्रतिवेदनमा ऋण सम्बन्धी संरक्षण र धितो सम्बन्धी व्यवस्था सन्तोषजनक रहेको उल्लेख छ । 

२०६५ सालमा ४५ जना कर्मचारीहरुबाट सुरु गरिएको सहरकारीले शेयर सदस्य कर्मचारीको तलवबाट मासिक रकम काटेर खातामा जम्मा गर्ने गरेको छ । यो रकम शुरुवात्मा ५ सय रुपैयाँ थियो । त्यसपछि १ हजार रुपैयाँ र २०७४ साल पुष महिनादेखि २ हजार रुपैयाँ काटेर जम्मा गर्न थालिएको थियो । यसलाई बढाएर अहिले ५ हजार रुपैयाँ पु¥याइएको छ । सहकारीले शेयर सदस्यहरुलाई ऋणबाहेक औषधि उपचार, परिवहन, सञ्चार, किरिया, सुत्केरी खर्चलगायतका सुविधा उपलब्ध गराउँदै आएको छ ।