कर्मचारी सरुवा मापदण्ड तर्जुमा गर्ने सुशासन समितिको निर्णय 

काठमाडौँ । काठमाडौँ महानगरपालिकामा कार्यरत कर्मचारीहरुको सरुवा सम्बन्धी मापदण्डका विषयमा छलफल भएको छ । आज सुशासन समितिका संयोजक ख्यामराज तिवारीको अध्यक्षतामा बसेको बैठकमा मानव संशाधन विकास महाशाखा प्रमुख गंगाधर गौत्तमले मापदण्ड सम्बन्धी मस्यौदा पेश गर्नुभएको थियो । काठमाडौँ महानगरपालिकामा कार्यरत कर्मचारीहरुको सेवा, सर्त तथा सुविधा व्यवस्थापन गर्न बनेको ऐन २०७७ को दफा ११४ र प्रशासकीय कार्यविधि (नियमित गर्ने) ऐन २०७५ ले दिएको अधिकार प्रयोग गरेर तयार पारिएको मस्यौदा मापदण्डमाथि आउँदो बैठकमा थप छलफल गरी कार्यपालिकामा पेश गर्ने बैठकले निर्णय गरेको छ । 

कर्मचारीहरुको कार्य क्षेत्रगत अनुभव र व्यक्तिगत कार्य क्षमता विकास गर्न सरुवा मापदण्ड आवश्यक देखिएको छ । संयोजक तिवारी भन्नुहुन्छ, ‘यसबाट कर्मचारीको सरुवा न्यायपूर्ण र व्यवस्थित हुन्छ । मनोबल उच्च हुन्छ ।’

नियुक्त हुँदाको सेवा, समूह, योग्यता, दक्षता तथा साविक पदमा बसेर काम गर्दाको कार्य सम्पादनलाई सरुवाको मापदण्ड बनाउनु पर्ने बैठकमा सुझाव प्राप्त भएको छ । कार्य सम्पादन प्रक्रियामा गुनासो आएमा २ बर्षको अवधि पूरा नभए पनि सरुवा गर्न सकिने विषय बैठकमा महत्वका साथ उठेको थियो । 

सरुवा गर्ने समय, रवाना लिने, हाजिर हुने, कार्य विवरण पठाउने, अन्यत्र कार्यालयबाट सरुवा भएर आएका कर्मचारीहरुको व्यवस्थापन लगायत विषय मापदण्डमा समेटिने छन् । 

बैठकमा समितिका सदस्यहरु भाइराम खड्गी, सरोज ढकाल, विभागीय प्रमुख दिपक अधिकारी, महाशाखा प्रमुख सरिता राई सहभागी हुनुहुन्थ्यो ।