महिला समूहका लागि प्रस्ताव लेखन तालिम सुरु

काठमाडौँ । काठमाडौँ महानगरपालिकाले महिला विकास समितिका अध्यक्ष र सचिवका लागि प्रस्ताव लेखन तालिम सुरु गरेको छ । फागुन २६ गते सुरु भएको तालिम २९ गते समापन हुनेछ । तालिममा महिला विकास समितिका अध्यक्ष र सचिव गरी ७४ जना सहभागी हुनुहुन्छ । 

महानगरका सबै वडामा महिला समूह छन् । यी समूहहरु वडाको जनसंख्या भौगोलिक अवस्था अनुसार कम्तीमा ६ वटा देखि बढीमा २५ वटासम्म छन् । एउटा समूहमा ५ जना सदस्य रहने व्यवस्था छ । यी समूहको क्रियाशीलताका आधारमा सदस्य छनौट गरेर हरेक वडामा महिला विकास समिति गठन गरिएको छ । यस्ता समितिहरु वडा नं. १४ वटा ३ वटा, वडा ३२ मा २ वटा र अन्य वडामा एक एक वटा छन् ।

संयुक्त राष्ट्रसंघको महिलाहरु उपर हुने सबै खालको विभेद उन्मुलन महासन्धीमा नेपाल सरकारले पक्ष राष्ट्र भएर १९९१ मा हस्ताक्षर गरेको छ । यसपछि छैटौँ योजनाबाट महिला समूह गठन गरेर कार्यक्रम थालनी गरिएको हो । समूहका महिलाहरु सशक्तिकरणका कार्यक्रमसँगै उद्यम प्रवर्धन गर्छन् । यसबाट भएको आयबाट बचत गर्ने, ऋण लगानी गर्ने, ऋण असुली गर्ने गर्छन् । यसबाट क्षमता बढेको छ । आत्म विश्वाश बढेको छ । हिंसा विरुद्ध काम गर्न सञ्जाल निर्माण भएको छ । यो सञ्जाल हिंसा न्यूनीकरणका लागि ठूलो शक्ति हो ।    

काठमाडौँ महानगरपालिकामा २०७५ सालबाट कार्यक्रम सुरु भएको हो । महानगरको सामाजिक विकास विभागले हिँसाको रेकर्ड राख्ने कपी, कलम, स्टाब्लर, बचत र ऋण कपीलगायत सामग्री उपलब्ध गराएको छ । यसै गरी बैठक तथा कार्यालय सञ्चालनका लागि मासिक सहयोग उपलब्ध गराउने गरेको छ । समूह तथा समितिहरुले सीप विकास तालिमलगायत विभिन्न क्रियाकलाप गरिरहेका छन् । 

तालिम सुरु गर्दै महानगरको प्रशासन विभागका प्रमुख दिपक अधिकारीले, वीउ पुँजी दिएर महिलाहरुलाई उद्यमी बनाउने कार्यक्रममा सहयोग गर्न महानगर तयार रहेको बताउनुभयो । यसै गरी सामाजिक विकास विभागका नि. प्रमुख गोपालप्रसाद पोखरेलले सिकेको सीप जीविकोपार्जनमा रुपान्तरण हुनुपर्ने धारणा राख्नुभयो । 

तालिममा विविधता तथा समावेशीकरण विज्ञ किशोर रिजाल र विपद व्यवस्थापन विज्ञ उद्धवराज अवस्थीले कक्षा सञ्चालन गर्नुहुनेछ । 

कार्यक्रम संयोजक भवानी कपालीका अनुसार तालिममा प्रस्तावका आधारभूत पक्ष, शीर्षक पहिचान, आवश्यकता र उद्देश्य लेखन, आवश्यकता पहिचान, परियोजना चक्र, डिजाइन, कार्यान्वयन, अनुगमन र मूल्याङ्कन, समस्या वृक्ष लगायत विषयमा प्रस्तुति र छलफल हुनेछ । लक्ष्य निर्धारण, प्रभाव र प्रतिफल मापन र लेखन, खण्ड बर्गीकरण लगायत पक्षमा सिकाइ गरिनेछ । यसरी सिकाइएका विषयमा लेखन अभ्यास गराइनेछ ।