मान्छेभन्दा अगाडिको बागमती सभ्यता जोगाउन, साझा धारणा निर्माण गरौँ — प्रमुख शाह

काठमाडौँ । ‘काठमाडौँको मुख्य नदी बागमतीको सभ्यता मान्छेभन्दा अगाडिको हो । यसलाई बचाउन साझा धारणा चाहिएको छ ।’ काठमाडौँ महानगरपालिकाका प्रमुख बालेन्द्र शाह (बालेन) ले प्रधानमन्त्री पुष्पकमल दाहाल ‘प्रचण्ड’ सँग यसलाई बचाउन सहयोगका लागि अनुरोध गर्नुभएको छ । बुधबारबाट महानगरले काठमाडौँमा सुरु गरेको न्यायिक समिति राष्ट्रिय सम्मेलन उद्घाटन समारोहमा उहाँले  भन्नुभयो, ‘कतिपय काम स्थानीय सरकार एक्लैले गर्न सक्दैन । सभ्यताजस्ता सार्वजनिक सम्पत्ति जोगाउन तहगत सरकार र सरकारका संयन्त्रको सहयोग चाहिन्छ । अहिले बागमतीको सभ्यता बचाउन काठमाडौँ महानगरपालिकालाई संघ सरकारको सहयोग चाहिएको छ । 

धारणा राख्ने क्रममा उहाँले स्थानीय विवाद निरुपणका लागि न्यायिक समितिले नागरिकमा आशा जगाउनु पर्ने विषय राखेपछि काठमाडौँको सार्वजनिक सम्पत्ति संरक्षणको विषय राख्नुभएको थियो । 

‘केन्द्रीय सरकारको स्थायित्वले स्थानीय सरकारका काममा सहयोग हुन्छ । त्यसैले स्थानीय सरकारजस्तै केन्द्रीय सरकार पनि स्थायी हुनुपर्छ । स्थानीय सरकार एक्लैले गर्न नसक्ने कामका लागि केन्द्रीय सरकारको स्थिर सहयोगको आवश्यक पर्छ ।’ शाहको भनाइ थियो । 

तस्विर : विनय शाक्य