सूचनाको हकअन्तर्गत उपलब्ध गराउनु पर्ने विवरण हामीले तोकिएको समय र माध्यमबाट उपलब्ध गराएका छौँ — सूचना अधिकारी आचार्य 

काठमाडौँ । सार्वजनिक महत्व र जनचासोसँग सम्बन्धित काठमाडौँ महानगरपालिकाका सूचना र विवरणहरु एक बर्षमा ४ पटक सार्वजनिक गर्ने गरिएको छ । महानगरले सूचनाको हक अन्तर्गत उपलब्ध गराउनु पर्ने विवरण सार्वजनिक गरेको छैन, भन्ने गुनासो सम्बन्धी प्रश्नको उत्तरमा सूचना अधिकारी वसन्त आचार्य भन्नुहुन्छ, ‘हरेक चौथो महिनाको १५ गतेभित्र अघिल्ला ३ महिनाको विवरण राष्ट्रिय दैनिक पत्रिकामा प्रकाशन गर्छौँ । हाम्रो वेभ पेजमा सूचनाको हकसँग सम्बन्ध राख्ने विवरण सार्वजनिक गर्ने छुट्टै प्लेटफर्म पनि छ ।’ सूचनाको हक सम्बन्धी ऐन २०६४ को दफा ५(३) र नियमावली २०६५ को नियम ३ लाई उधृत गर्दै आचार्य थप्नुहुन्छ, ‘चालु आर्थिक बर्षमा हामीले कार्तिक र माघ महिनामा २ पटक विवरण सार्वजनिक गरिसकेका छौँ । बैशाख १५ गतेभित्र माघ, फागुन र चैत महिनाको विवरण प्रकाशन गर्ने तयारी गरेका छौँ ।’ 

महानगरमा निवेदन दिएर सूचना माग गर्नेहरुलाई रीत बमोजिम समयमा नै सूचना र विवरण उपलब्ध गराउने गरेका छौँ । आचार्य थप्दै भन्नुहुन्छ, ‘सूचनाको हक सम्बन्धी ऐनबमोजिम नियमित रुपमा विवरण सार्वजनिक गर्ने काममा महानगरले दायित्व पूरा गरेको छ ।’