ज्येष्ठ १३ गते विशेष सरसफाइमा सहभागी हुन प्रमुख शाहको आग्रह

काठमाडौँ । ज्येष्ठ १३ गते शनिवार बिहान ७ बजेदेखि १० बजेसम्म आयोजना हुने विशेष सरसफाइ कार्यक्रममा सहभागी हुन सरोकारवाला सबैलाई काठमाडौँ महानगरपालिकाका प्रमुख बालेन्द्र शाह (बालेन) ले आग्रह गर्नुभएको छ । स्थानीय तह सदस्य निर्वाचन २०७९ बाट निर्वाचित जनप्रतिनिधिले पद वहाली गरेको एक बर्ष पूरा भएको अवसरमा सरसफाइ कार्यक्रम आयोजना गर्न, साझेदारले आयोजना गर्ने कार्यक्रममा सहयोग र समन्वय गर्न प्रमुख शाहले वडा अध्यक्षहरुलाई पत्रमार्फत अनुरोध गर्नुभएको छ । 

‘विशेष सरसफाइ कार्यक्रममा वडाका सम्पूर्ण जनप्रतिनिधि तथा कर्मचारीसहित वडाका सबै सरोकारवाला समेतलाई अधिकतम सहभागी गराइ कार्यक्रम प्रभावकारी रुपमा सम्पन्न गर्नुहुन समेत अनुरोध छ ।’ प्रमुख शाहले पठाउनुभएको पत्रमा उल्लेख छ । 

सरसफाइ गरिने स्थानको छनौट र आवश्यक सामग्री वडाले उपलब्ध गराउनेछन् । संकलित फोहोर उठाउने तथा अन्तिम व्यवस्थापन गर्ने काम वातावरण विभागले फोहोर व्यवस्थापनमा काम गर्ने निजी क्षेत्रको सहयोगमा गर्नेछ । 

गएको बर्ष (२०७९) बैशाख ३० गते शुक्रबार स्थानीय तह सदस्य निर्वाचन सम्पन्न भएको थियो । बैशाख ३१ गते शनिवारबाट सुरु गरिएको मत गणना जेठ १३ गते शुक्रबार सकिएको थियो । त्यसै दिन राती १०ः३० बजे मत परिणाम घोषणा गरिएको थियो । त्यसको भोलिपल्ट अर्थात जेठ १४ गते शनिवार विहान ०८ः०० बजे मूख्य निर्वाचन अधिकृतको कार्यालयले औपचारिक रुपमा वधाइ कार्यक्रम आयोजना गरेको थियो । 

जेठ १६ गते सोमबार विहान १०ः०० बजे पद तथा गोपनीयताको शपथ ग्रहण कार्यक्रम सम्पन्न भयो । त्यसै दिन अपरान्ह ४ बजे कार्यपालिकाको पहिलो बैठक बसेको थियो ।