विभागहरुसँग अनुगमनका सवालमा छलफल सकियो : अब साझा र क्षेत्रगत अनुगमनका सूचक तयार पारिने

काठमाडौँ । काठमाडौँ महानगरपालिकाको अनुगमन तथा मूल्याङ्कन समितिले विभागस्तरीय अनुगमनका सवालमा अन्तरक्रियात्मक छलफल सकेको छ । ४ कार्य दिनमा महानगरपालिकाको सङ्गठन संरचनाका सबै विभाग, एकाई, आयोजना, सचिवालय, कार्यक्रमका विभागीय प्रमुख तथा महाशाखा प्रमुखहरुसँग छलफल गरेको हो । योजना, अनुगमन तथा मूल्याङ्कन एकाईको समन्वयमा भएको छलफलमा योजना, कार्ययोजना, अनुगमन गर्नु पर्ने क्षेत्र, त्यसका लागि आवश्यक पर्ने सूचक, आन्तरिक तथा वाह्य समन्वयका क्षेत्रलगायत विषयमा छलफल भएको थियो । छलफलमा पूर्व सचिव रेश्मिराज पाण्डेले अनुगमनका सवालहरूको सम्बोधन कसरी गर्न सकिएला भनेर सुझाउनु भएको थियो । 

छलफलको समापन गर्दै छलफलको समापन गर्दै समितिकी संयोजक एवं महानगरपालिकाकी उपप्रमुख सुनिता डंगोलले, नीति, योजना तथा कार्यक्रमको प्रभाव मापन गर्न अनुगमन मूल्याङ्कन प्रणालीलाई व्यवस्थित गर्न लागिएको बताउनुभयो । ‘कार्यान्वयन योग्य र व्यवहारिक कार्यविधिले अनुगमनलाई व्यवस्थित बनाउँछ । यसका लागि तपाईँहरुसँग छलफल गरेका हौँ ।’ डंगोलले भन्नुभयो, ‘छलफलका क्रममा हामीले सोचभन्दा धेरै पृष्ठपोषण, कानुनी र व्यवहारिक सवालहरु आएका छन् । यी सवाललाई सूचकमा रुपान्तरण गर्न तपाईहरुको यत्तिकै क्रियाशीलताको अपेक्षा गरेकी छु ।’

विगतको सेवा प्रवाह र पूर्वाधार विकासको पद्धति तथा यससँग जोडिएका नतिजा हेर्दा कतिपय ठाउँमा कानुनी प्रबन्ध नै सुधार गर्नु पर्ने जस्तो देखिएको छ । छलफलमा समितिका सदस्य एवं वडा २० का अध्यक्ष राजेन्द्र मानन्धरको धारणा थियो । 

यस अघिका कानुनी प्रबन्धमा छुटेका तथा त्यसमा जटिलता देखिएका विषयलाई सहजीकरण गर्न कार्यविधि तर्जुमा गर्न लागिएको एकाईका प्रमुख नरेन्द्रबिलास बज्रचार्यले जानकारी दिनुभयो ।

अनुगमनका सवालहरुमा हामीले वडामा भएका काम र जिम्मेवारीसँग सम्बन्धित विषयका सवालहरुमा स्पष्ट हुनु पर्नेछ । कार्यक्रमको सहजीकरण गर्दै एकाईका उपनिर्देशक एवम् अनुगमन तथा मूल्याङ्कन समितिका सहायक सदस्य–सचिव प्रहलाद घिमिरेले भन्नुभयो, ‘सूचक निर्माण गर्नका लागि प्रशिक्षक प्रशिक्षण कार्यक्रम चलाएर महानगरपालिका अधिकारीहरुलाई विज्ञ बनाउने योजना छ ।’ 

घिमिरेका अनुसार वडास्तरीय अनुगमनका सवालमा पनि छलफल हुनेछ । यी सबै पृष्ठपोषण अनुगमन कार्यविधि र अनुगमन टोली परिचालन कार्यविधि तर्जुमाका लागि हुन् ।