वडाध्यक्ष महर्जनका २ वटा म्युजिक भिडियो सार्वजनिक

काठमाडौँ । काठमाडौँ महानगरपालिका वडा नं. १८ का अध्यक्ष न्हुच्छेकाजी महर्जनको शव्दमा आफैँ मोडलिङ् गर्नुभएका २ वटा म्युजिक भिडियो सार्वजनिक गरिएको छ । आज बागबजारमा रहेको सिटीम्याक्स सिनेमा हलमा महानगरपालिकाकी उपप्रमुख सुनिता डंगोलले, नेपाली भाषाको ‘यो मनमा त्यो मन’ बोलको र नेपाल भाषाको ‘छंगु नुगलय्’ बोलको भिडियो सार्वजनिक गर्नुभएको हो । 

भिडियो सार्वजनिक गर्दै उपप्रमुख डंगोलले भन्नुभयो, ‘महर्जनलाई हेर्दा सँधै गम्भीर मुद्रामा भएको महसुृस हुन्थ्यो । आज भिडियो हेरेपछि थाहा भयो, उहाँ जति गम्भीर हुनुहुन्छ । त्यत्तिकै रोमान्टिक पनि हुनुहुँदो रहेछ ।’ त्यस क्रममा महानगरपालिकाका निवर्तमान प्रमुख विद्यासुन्दर शाक्यले, गीत संगीत सामाजिक रुपान्तरणको सशक्त माध्यम रहेको बताउँदै रुपान्तरणका लागि गीतको प्रयोग प्रजातन्त्रले दिएको उपलब्धी भएको बताउनुभयो । 

राजनीतिबाट फुर्सद निकालेर साहित्य लेखनका लागि समय मिलाउने गरेको छु । कार्यक्रममा महर्जनले भन्नुभयो, ‘साहित्यको गहिराइ मलाई मीठो लाग्छ । यसै क्रममा लेखिएका शव्दमा संगीत भरेर भिडियो बनाइएको हो ।’

दुवै भिडियोमा महर्जन आफैँले मोडलिङ् गर्नुभएको छ । उहाँसँग भिडियोमा रति महर्जनको अभिनय छ । नेपाल भाषाको गीतमा सरस्वती मानन्धर र राजेन्द्र शाक्यको स्वर रहेको छ । नेपाली गीतमा राजेन्द्र शाक्यको स्वर छ । यस गीतमा महर्जनसँग रति र सुरज नापितसँग आराध्यलक्ष्मी खड्गीलाई जोडीका रुपमा प्रस्तुत गरिएको छ । दुवै गीतका शव्दमा दिप तुलाधरले संगीत दिनुभएको छ । 

नेपाली गीतको भिडियाका निर्देशक रवि सायमी र नेपाल भाषाको गीतमा बनाइएको भिडियोका निर्देशक रवि सायमी हुनुहुन्छ ।