तालिमका प्रशिक्षार्थीको 'सिप विकास परीक्षण' सहरी योजना आयोगले गर्ने 

काठमाडौँ । टुँडिखेलमा काठमाडौँ महानगरपालिका सञ्चालन गरिरहेको 'सिप मेला'मा तालिम लिइरहेको व्यक्तिहरुले प्राप्त गरेको सिपलाई सहरी योजना आयोगले परीक्षण गर्ने भएको छ । तालिमबाट श्रम बजारमा पठाउन योग्य जनशक्ति उत्पादन सुनिश्चित गर्न आयोगले विज्ञसहित अनुगमन गरेर प्रशिक्षार्थीहरुको सिप परीक्षण गर्न लागेको हो । ‘तालिम कार्यक्रम चलाउनका लागि होइन, यो नतिजाका लागि हुनुपर्छ । तालिम लिने व्यक्ति, आफ्नो क्षमता कागजमा होइन, व्यवहारमा देखाउन सक्ने हुनुपर्छ । यसका लागि सिप परीक्षण गर्ने योजनामा छौँ ।’ आज मेलाको अवलोकनका लागि जानु भएका सहरी योजना आयोगका उपाध्यक्ष डा. सुमननरसिंह राजभण्डारीले भन्नुभयो, ‘सिप विकास तालिमका प्रचलित सूचक र योग्यता निर्धारण विधिको प्रयोग गरेर परीक्षण गर्नेछौँ ।’

‘तालिम प्राप्त गरेका व्यक्तिहरु काम गर्न निपूर्ण हुनुपर्छ । यसका लागि प्राप्त ज्ञान र प्रयोगात्मक सिपको मापन हेर्नेछौँ । प्रशिक्षण विधि, पाठ््यक्रम, सिकाइ विधि र सिकारुहरुमा आउने परिवर्तन हेर्नेछौँ । बजारले माग गरेका जनशक्ति र तालिमबाट प्राप्त योग्यताको स्तर हेर्नेछौँ ।’

उपाध्यक्ष राजभण्डारीसहितको टोलीलाई इञ्जिनियर शैलेन्द्र झा र रोजगार संयोजक देवेन्द्र के. सी. ले, तालिमका विषय, प्रशिक्षक, प्रशिक्षार्थीहरुका विषयमा जानकारी गराउनुभएको थियो । यस क्रममा इञ्जिनियर झाले भन्नुभयो, ‘आयोगले निगरानी बढाएपछि तालिमको स्तर वृद्धि हुनेछ । योग्यता प्रमाणित गर्ने बलियो आधार प्राप्त हुनेछ ।’

उपाध्यक्ष राजभण्डारीले, प्रशिक्षकबाट प्रशिक्षण सहजता र प्रशिक्षार्थीबाट सिकेको सिप र प्राप्त ज्ञानका बारेमा जानकारी लिनुभएको थियो । 

राजभण्डारीसँग सहरी योजना आयोगका विज्ञ र सहायक विज्ञहरु जानुभएको थियो ।