वडा नं. ५ मा विद्यालयस्तरीय बुद्धिचाल प्रतियोगिता सुरु

काठमाडौँ । हाँडीगाउँ (नरः) मा आजदेखि विद्यालयस्तरीय बुद्धिचाल (चेस) प्रतियोगिता सुरु भएको छ । काठमाडौँ महानगरपालिकाको वडा नं. ५ ले आयोजना गरेको प्रतियोगितामा ११ वटा विद्यालयका ५९ जना छात्रछात्रा सहभागी हुनुहुन्छ । जसमध्ये छात्राको संख्या १० जना रहेको छ । 

बालबालिकाको वौद्धिक विकास गराउन र आपसमा भेट भएर खेल खेल्ने संस्कारको विकास गराउन यसप्रकारको प्रतियोगिता आयोजना गरिएको हो । खेल आयोजनाको उद्देश्यका बारेमा जानकारी दिँदै वडाध्यक्ष वीरेन्द्र प्रजापती भन्नुहुन्छ, ‘भेला भएर खेलिने खेलले व्यक्तिको सामाजिक सिप विकास हुन्छ । मोवाइलको लतले एक्लो जीवनतर्फ उन्मुख बाल संसार सामाजिक जीवनमा फर्काउन खेलले ठुलो भूमिका खेल्ने अपेक्षा गरेका छौँ ।’

प्रतियोगितामा कक्षा १ देखि १० सम्मका छात्रछात्रालाई सहभागी गराइएको छ । जसमा कक्षा १ देखि ८ सम्मका बालबालिकाको एउटा समूह र कक्षा ९ र १० का विद्यार्थीहरुको अर्को समूह बनाइएको छ । 

खेल स्वीस लीग सिस्टमबाट सञ्चालन हुनेछ । यसमा हरेक खेलाडीलाई ५ खेल खेलाइनेछ । यसरी खेल्दा प्रदान गरिने अङ्क जोड्दा उच्च अङ्क जसले प्राप्त गर्छ । त्यसैका आधारमा विजेता घोषित गरिनेछ ।

खेलमा प्रथम हुनेलाई १० हजार रुपैयाँ, दोस्रो हुनेलाई ७ हजार रुपैयाँ, तेस्रो हुनेलाई ५ हजार रुपैयाँ र सान्त्वाना स्थान हासिल गर्ने २ जनालाई जनही २ हजार ५ सय रुपैयाँ नगदसहित प्रमाण पत्र प्रदान गरिनेछ । 

वडामा एउटा सामुदायिक, एउटा गुठी र १५ वटा संस्थागत विद्यालय छन् ।