काठमाडौँ महानगरपालिकाको केन्द्रीय टिमको विजयी शुरुवात : आयोजक वडा २३ टिमसँग टाइव्रेकर २-१ ले विजयी

काठमाडौँ । काठमाडौँ महानगरपालिकाको केन्द्रीय टिमले दोस्रो ‘प्रयागराज सिंह सुवाल स्मृति फुटसल प्रतियोगिता’को विजयी यात्रा सुरु गरेको छ । लैनचौर खेल मैदानमा भएको उद्घाटन खेलमा आज आयोजक वडा नं. २३ लाई टाइव्रकेरमा २-१ अन्तरले विजयी यात्रा सुरु गरेको हो । निर्धारित समयमा दुवै टिमको १-१ गोल भएको थियो । शुरुवात्मा अनुप मगरले केन्द्रलाई अग्रता दिलाएको थियो । यसपछि वडा नं. २३ का राजीव चित्रकारले गोल गरेर बराबरी बनाए । पेनाल्टी सुटआउटमा केन्द्रले प्रिक्वाटरफाइनलका लागि स्थान बनाएको हो । अनुप आजको खेलको म्यान अफ द म्याच घोषित भए ।

उद्घाटन खेलमा महानगरपालिकाका उपप्रमुख सुनिता डंगोलले रेफ्रीलाई बल दिनुभएको थियो । खुला उमेर समूहका पुरुष खेलाडी बिच हुने खेलमा महानगरका हरेक वडाबाट एउटा/एउटा समूहले भाग लिनेछन् । नकआउटका आधारमा हुने खेल हरेक दिन विहान ८ बजेदेखि १२ बजेसम्म हुनेछ । खेल असोज ९ गतेसम्म चल्नेछ ।   

आजको दोस्रो खेलमा वडा नं.९ ले वडा नं. २७ लाई २-० गोल अन्तरले पराजित ग¥यो । वडा नंं ९ का लागि दुवै गोल मिङ्मा लामा तामाङ्ले गरेका थिए । यसमा मिङ्मा नै म्यान अफ द म्याच घोषित भए । 

तेस्रो खेल वडा नं. ६ र ११ का बिचमा भएको थियो । यस खेलमा वडा नंं ६ ले ११ लाई ३-२ गोल अन्तरले पराजित गर्‍यो । वडा नं. ६ का लागि विपल्व लामा, दिपेश श्रेष्ठ र केशव भण्डारीले १/१ गोल गरेका थिए । वडा नं. ११ का लागि जनक कोइराला र रितेश महतोले गोल गरेका थिए । खेलमा वडा नं. ६ का केशव म्यान अफ द म्याच घोषित भए । 

खेल शुभारम्भ गर्दै उपप्रमुख डंगोलले, स्वास्थ्य र सकारात्मक सोचका लागि खेलको ठूलो भूमिका रहेको उल्लेख गर्नुभयो । ‘खेल जस्तै अनुशासन र स्वच्छ प्रतिस्पर्धा अन्य पेशाका लागि उदाहरण हो ।’ डंगोलले भन्नुभयो, ‘फुटसल संस्कृतिले युवाहरुलाई गलत काममा लाग्नबाट बचाएको छ ।’

प्रतियोगिताले खेलमार्फत युवाहरुलाई स्वस्थ्य रहन मद्दत गर्ने वडा २३ का अध्यक्ष एवं विधायन समितिका संयोजक मचाराजा महर्जनले बताउनुभयो । उहाँकाअनुसार खेलका विजेता टीमलाई २ लाख रुपैयाँ, उपविजेतालाई टीमलाई १ लाख रुपैयाँ प्रदान गरिनेछ । उत्कृष्ट खेलाडी, सर्वाधिक गोलकर्ता र गोलरक्षक १/१ जनालाई १० हजार रुपैयाँसहितको पुरस्कार दिइनेछ । 

यसप्रकारका खेलले वडाहरुको आपसी सम्बन्ध प्रगाढ बनाउने छ । शुभारम्भ अवसरमा वडा नंं २६ का अध्यक्ष एवं सुशासन समितिका संयोजक ख्यामराज तिवारीले, युवा लक्षित खेलका कार्यक्रम बढाउँदै लगिने बताउनुभयो । हामीले खेल मैदान बनाएर आफैँ प्रतियोगिता गराउन सक्ने भएका छौँ । यो खेलप्रति महानगरपालिकाको प्राथमिकताको उदाहरण हो । तिवारीको भनाइ थियो । 

प्रतियोगितामा ३२० युवाले प्रत्यक्ष प्रतिस्पर्धा गर्ने र ५ सय युवा कार्यक्रमका लागि परिचालित हुने अपेक्षा गरिएको छ । 

तस्विर : अमृत पाण्डे