'स्थानीय र रैथाने उत्पादनको प्रवर्धन तथा बजारीकरणका लागि सहयोग गर्छौँ '- संयोजक तिवारी, सुशासन समिति  

काठमाडौँ । महानगरबासीलाई ताजा तरकारी, अन्न र फलफुल उपलब्धता गराउन काठमाडौँ महानगरपालिकाले स्थानीय तथा रैथाने उत्पादनको प्रवर्धन र बजारीकरणका लागि काम गरिरहेको सुशासन समितिका संयोजक एवं वडा नं. २६ का अध्यक्ष ख्यामराज तिवारीले बताउनुभएको छ । शनिवारदेखि गोङ्गवु आवास क्षेत्रमा सुरु भएको कृषि मेलाको उद्घाटन गर्दै उहाँले यस्तो बताउनुभएको हो । वडाको सहयोगमा रैथाने एग्रो प्रडक्ट नेपाल र गोङ्गबु आवास क्षेत्रको आयोजना मेला आयोजना गरिएको हो । 

‘यस्ता मेलाले उपभोक्ताहरुलाई स्थानीय उत्पादन चिन्न सहयोग गर्छ । बस्तुको बजारीकरण र प्रवर्धनका लागि यसरी बस्तु पहिचान गर्नु नै मुख्य कुरा हो ।’ तिवारीले भन्नुभयो, ‘हामी महानगरका अन्य वडामा पनि यस्ता मेला विस्तार गर्ने योजनामा छौँ । यही मेलाको स्टलका लागि नपुग २० वटा टेवल पनि उपलब्ध गराउँदैछौँ ।’
 
रैथाने एग्रो प्रडक्टका अभियन्ता कृष्ण स्याङ्ताङका अनुसार मेलामा नेपालका ५५ जिल्लाका मौलिक तथा रैथाने उत्पादनहरू प्रदर्शनी र बिक्रीका लागि राखिएका छन् । विभिन्न जिल्लामा उत्पादन भएका मह, सिस्नोको धुलो, अर्गानिक चामल, गेडागुडी, सातु, सुन्तलाका साथै स्थानीय स्तरमा उत्पादित कपडाहरू मेलाका मुख्य आकर्षण हुन् । 

कृषि उपजका उत्पादक र उपभोक्ताको सिधा सम्बन्ध मेलाको मुख्य विशेषता हो । मेला पुस १७ गतेसम्म चल्नेछ ।